مئی کا مہینہ پاکستان کی تاریخ میں اہم، کون سے بڑے واقعات رونما ہوئے؟

10 مئی 2025 کو بھارت کے خلاف افواج پاکستان کی جانب سے کیے گئے آپریشن ’بنیان مرصوص‘ کی کامیابی کے جہاں چرچے ہورہے ہیں، وہیں مئی کے مہینے کو پاکستان کی تاریخ میں انتہائی اہم بھی قرار دیا جارہا ہے، کیوں کہ اسی مہینے میں پاکستان ایٹمی طاقت بنا، اور اسی مہینے میں 12 مئی اور 9 مئی جیسے واقعات بھی رونما ہوئے۔

’وی نیوز‘ نے تحقیق کرتے ہوئے عوام کو یہ بتانے کی کوشش کی ہے کہ آخر مئی کے مہینے میں پاکستان کی تاریخ میں کون سے اہم واقعات رونما ہوئے۔

28 مئی 1998 جب پاکستان نے ایٹمی دھماکے کیے

مئی کے مہینے میں پاکستان نے جو سب سے بڑا معرکہ انجام دیا وہ 28 مئی 1998 کو ایٹمی دھماکے کرنے کی صورت میں تھا۔ 28 مئی 1998 کو اس وقت کے وزیراعظم نواز شریف سمیت تمام سول و عسکری قیادت نے تمام تر دباؤ مسترد کرتے ہوئے بھارت کے 5 دھماکوں کے جواب میں 6 دھماکے کرکے پاکستان کے پہلے اسلامی ایٹمی طاقت ہونے کا اعلان کردیا۔

2 مئی 2011 کو ایبٹ آباد میں اسامہ بن لادن کی ہلاکت

2 مئی 2011 کو امریکا نے خیبرپختونخوا کے علاقے ایبٹ آباد میں ایک آپریشن کرتے ہوئے القاعدہ رہنما اسامہ بن لادن کو ہلاک کردیا تھا، جس کے بعد دعویٰ کیا گیا تھا کہ ان کی لاش کو بھی سمندر برد کردیا گیا، یہ واقعہ پاکستان کی تاریخ میں نہایت اہمیت کا حامل ہے، جس پر پوری دنیا کے میڈیا کے نے تبصرے کیے تھے۔

یاد رہے کہ جب اسامہ بن لادن کے خلاف ایبٹ آباد میں آپریشن کیا گیا اس وقت ملک میں پاکستان پیپلزپارٹی برسراقتدار تھی۔

12 مئی 2007 جب کراچی میں 50 سے زیادہ افراد لقمہ اجل بن گئے

اس کے علاوہ مئی کے مہینے کا ایک دلخراش واقعہ جو 12 مئی 2007 کو روشنیوں کے شہر کراچی میں پیش آیا، جب دہشتگردی کے واقعات میں 50 سے زیادہ شہریوں کو ہلاک کردیا گیا۔

12 مئی 2007 وہ دن تھا جب معزول کیے گئے چیف جسٹس افتخار محمد چوہدری نے سندھ ہائیکورٹ میں وکلا سے خطاب کرنا تھا۔ اس روز ان کی کراچی آمد کے موقع پر جلاؤ گھیراؤ اور فائرنگ کے پے درپے واقعات میں 50 سے زیادہ شہری جان سے ہاتھ دھو بیٹھے۔

واضح رہے کہ اس وقت ملک میں جنرل پرویز مشرف اقتدار پر براجمان تھے۔ 12 مئی کو پیش آنے والے جلاؤ گھیراؤ کے واقعات میں جان سے ہاتھ دھونے والوں کے لواحقین ابھی تک انصاف کے منتظر ہیں، تاہم کیسز زیرالتوا ہیں۔

9 مئی 2023 کو پی ٹی آئی کی طرف سے فوجی تنصیبات پر حملہ

مئی کے مہینے کا ایک اور دلخراش واقعہ 9 مئی 2023 کو پیش آیا جب سابق وزیراعظم عمران خان کو القادر ٹرسٹ کیس میں اسلام آباد ہائیکورٹ سے گرفتار کیا گیا۔

عمران خان کی گرفتاری کی خبر سامنے آتے ہی پی ٹی آئی کے حامی سڑکوں پر نکل آئے اور احتجاج کرتے ہوئے فوجی تنصیات پر دھاوا بول دیا۔

پی ٹی آئی کے رہنماؤں اور کارکنوں نے جی ایچ کیو راولپنڈی، جناح ہاؤس لاہور سمیت دیگر کئی شہروں میں فوجی تنصیبات پر حملے کیے اور شہدا کے مجسمے تک توڑ دیے۔

پی ٹی آئی کے کئی رہنما اب بھی 9 مئی کے واقعات میں جیل میں قید ہیں، جن میں سے کچھ کو سزا ہو چکی ہے، جبکہ کچھ کا ٹرائل چل رہا ہے۔

حال ہی میں اس مہینے میں پیش آنے والا واقعہ پاک بھارت کشیدگی کی صورت میں بھی سامنے آیا ہے جو اب تاریخ کا حصہ بن گیا ہے۔

10 مئی بھارت کے خلاف مسلح افواج پاکستان کے آپریشن ’بنیان مرصوص‘ کی کامیابی

22 اپریل 2025 کو مقبوضہ کشمیر کے علاقے پہلگام میں سیاحوں پر ہونے والے ایک حملے کا الزام بھارتی حکومت کی جانب سے پاکستان پر عائد کیا گیا، اور یکطرفہ اقدامات کرتے ہوئے سندھ طاس معاہدہ معطل کردیا گیا، جبکہ پاکستانی شہریوں کو حکم دیا گیا کہ وہ ملک سے نکل جائیں۔ اس کے ساتھ ساتھ ہندوستان نے پاکستان کو سنگین نتائج کی دھمکی بھی دی۔

پاکستان نے بھارت کے خلاف فوری جوابی کارروائی کرتے ہوئے بھارتی شہریوں کو ملک چھوڑنے کا حکم دینے کے ساتھ ساتھ پڑوسی ملک کے ساتھ تجارت فوری معطل کردی اور واضح کیاکہ اگر ہمارا پانی بند کیا گیا تو جنگ ہوگی۔

بھارت نے 6 اور 7 مئی کی درمیانی شب پاکستان کے 6 مختلف مقامات پر 24 حملے کیے جس کے نتیجے میں معصوم شہری شہید ہوئے، تاہم پاکستان نے فوری جوابی کارروائی کرتے ہوئے دشمن کے 5 جہاز تباہ کردیے۔

بھارت اس حرکت کے بعد بھی باز نہ آیا اور پاکستان پر ڈورنز کے ذریعے حملے شروع کردیے۔ 10 مئی کی رات کو بھارت نے پاکستان کے ایئر بیسز کو نشانہ بنانے کی کوشش کی جسے ناکام بنا دیا گیا۔

اس کے بعد پاکستان نے 10 مئی کو ہی فجر کی نماز کے بعد آپریشن ’بنیان مرصوص‘ شروع کرتے ہوئے بھارت کے اندر فوجی تنصیبات کو نشانہ بنایا۔ پاک فضائیہ نے بھارت کے اندر جا کر کارروائی کی اور دشمن کو بھاری نقصان پہنچایا۔

بھارت کے اینٹی ایئر کرافٹ سسٹم ایس 400 کی تباہی پاکستان بھارت جنگ کا سب سے بڑا واقعہ

پاکستان اور بھارت کی اس جنگ میں بھارت کے اینٹی ایئر کرافٹ سسٹم ایس 400 کی تباہی پاکستان بھارت جنگ کا سب سے بڑا واقعہ ہے۔

’بلغاریہ ملٹری ریویو‘ کے مطابق پاکستان نے بھارت کے خلاف جوابی کارروائی کرتے ہوئے بھارت کے اینٹی ایئر کرافٹ سسٹم ایس 400 کو تباہ کیا، جو سب سے زیادہ ہائی پروفائل واقعہ ہے۔

مئی میں پیش آنے والے دیگر واقعات کی طرح اب 10 مئی بھی تاریخ کا حصہ بن گیا ہے اور وزیراعظم شہباز شریف نے اعلان کیا ہے کہ اب ہر سال 10 مئی کو یوم معرکہ حق منایا جائےگا۔