موہن داس کرم چند گاندھی کے پوتے ارون منی لال گاندھی کولہا پور، مہاراشٹر میں چل بسے۔ ان کی عمر 89 برس تھی۔
بھارتی میڈیا کے مطابق ارون گاندھی کے بیٹے تشار گاندھی نے منگل کو ٹوئٹ کر کے یہ اطلاع دی۔ ارون گاندھی گزشتہ کئی دنوں سے بیمار تھے۔
ارون گاندھی مہاتما گاندھی کے دوسرے بیٹے منی لال گاندھی کے بیٹے ہیں۔ وہ 14 اپریل 1934 کو ڈربن، جنوبی افریقہ میں پیدا ہوئے۔ ان کے والد ’انڈین اوپینین‘ کے ایڈیٹر تھے جب کہ ان کی والدہ اسی اخبار کی پبلشر تھیں۔
انہوں نے اپنے دادا کے راستے پر چلتے ہوئے سماجی و سیاسی مسائل پر ایک کارکن کے طور پر کام کیا۔
ارون گاندھی نے کچھ کتابیں بھی لکھیں جن میں دی گفٹ آف اینگر: اینڈ ادر لیسنز فرام مائی گرینڈ فادر مہاتما گاندھی نمایاں ہے۔ وہ سنہ 1987 میں اپنے خاندان کے ساتھ امریکا میں آباد ہو گئے تھے جہاں انہوں نے کرسچن برادرز یونیورسٹی میں عدم تشدد سے متعلق ایک انسٹی ٹیوٹ بھی قائم کیا تھا۔
