وفاقی حکومت آئندہ مالی سال کے بجٹ میں اسلام آباد میں کام کرنے والی رائیڈ ہیلنگ سروسز پر سیلز ٹیکس عائد کرنے پر غور کر رہی ہے۔
ذرائع کے مطابق، فیڈرل بورڈ آف ریونیو (ایف بی آر) آئندہ مالی سال 2025-26 کے بجٹ میں کیب ایگریگیٹرز پر 4 فیصد سیلز ٹیکس لگانے کی تجویز پر غور کر رہا ہے۔ اس وقت وفاقی دارالحکومت میں رائیڈ ہیلنگ سروسز پر کوئی سیلز ٹیکس عائد نہیں کیا جاتا۔
دوسری جانب پنجاب، سندھ، اور خیبر پختونخوا کی صوبائی ریونیو اتھارٹیز پہلے ہی ان سروسز پر 5 فیصد سیلز ٹیکس وصول کر رہی ہیں۔
مزید پڑھیں: ابوظہبی میں خودکار روبوٹیکسی سروس، 2026 میں مکمل آغاز کا منصوبہ
ذرائع کا کہنا ہے کہ ایف بی آر نے رواں سال کے بجٹ میں بھی یہ تجویز شامل کی تھی، تاہم آخری لمحات میں اسے فنانس بل سے نکال دیا گیا تھا۔
پاکستان میں مختلف شہروں میں کئی رائیڈ ہیلنگ کمپنیاں کام کر رہی ہیں جن میں ان ڈرائیو، کریم، بائیکیا، جگنو اور یانگو شامل ہیں۔ ان میں سب سے زیادہ مارکیٹ شیئر ان ڈرائیو کے پاس ہے، جو ملک بھر میں 60 فیصد سے زائد حصے پر قابض ہے۔
