کنول شوزب کا پارٹی کی تباہی سے متعلق ویڈیو لیک ہونے کے بعد پہلی بار علیمہ خان سے آمنا سامنا

پاکستان تحریک انصاف کے بانی عمران خان ہمشیرہ علیمہ خان اور پی ٹی آئی خواتین ونگ کی صدر کنول شوزب کا آمنا سامنا ہوگیا۔

کنول شوزب کی حال ہی میں ایک ویڈیو لیک ہوئی جس میں انہوں نے علیمہ خان کو تنقید کا نشانہ بنایا تھا۔

یہ بھی پڑھیں کنول شوزب نے علیمہ خان کے پارٹی میں کردار پر سوالات اٹھا دیے، ویڈیو لیک

راولپنڈی کی انسداد دہشتگردی عدالت میں آمنا سامنا ہونے پر کنول شوزب نے علیمہ خان کو مخاطب کرتے ہوئے کہاکہ علیمہ آپا مجھے آپ سے بات کرنی ہے۔

علیمہ خان نے کنول شوزب کو جواب دیتے ہوئے کہا ہمیں الزامات سہنے کی عادت ہوگئی ہے، بہت لوگ باتیں کرتے ہیں، بس چھوڑو ٹھیک ہے جو تم نے کہا۔

کنول شوزب نے کہاکہ مجھے اسی سلسلے میں آپ سے بات کرنی ہے، لیکن علیمہ یہ کہتے ہوئے انہیں نظرانداز کرکے آگے نکل گئیں کہ جاؤ میں تم سے ناراض نہیں ہوں۔

واضح رہے کہ کنول شوزب کی حال میں لیک ہونے والی ویڈیو میں انہوں نے علیمہ خان کو تنقید کا نشانہ بناتے ہوئے کہا تھا کہ ان کی وجہ سے پارٹی تباہ ہورہی ہے۔

یہ بھی پڑھیں پشاور پی ٹی آئی کا سیاسی قبلہ، یہیں سے انصاف کی توقع ہے، کنول شوزب

اس موقع پر کنول شوزب نے گفتگو کرتے ہوئے کہاکہ زوم میٹنگ کی ایک ویڈیو کاٹ کر میرے خلاف پروپیگنڈا کیا جارہا ہے، علیمہ خان اپنے بھائی کے لیے جدوجہد کررہی ہیں اور ہم ان کے ساتھ ہیں۔