ٹرمپ دوبارہ صدر بننے کے بعد سے ٹروتھ سوشل پر اکثر پاکستان کے حق میں پوسٹ کرتا دکھائی دیتا ہے۔ 10 مئی کو ایسی ہی ایک پوسٹ میں ٹرمپ نے کہا کہ ‘پاکستان ٹیلنٹڈ لوگوں کا ملک ہے، ہمیں فخر ہے کہ ہم ان کے ساتھ مل کر دہشتگردی کے خلاف لڑ رہے ہیں’۔
17 مئی کو تو لٹ ہی پڑگئی۔ فاکس نیوز کو ایک انٹرویو میں ٹرمپ نے پاکستان کو ‘دنیا کے بہترین اور باصلاحیت لوگوں’ کا ملک بھی قرار دے دیا جو بہترین پراڈکٹ تیار کرتے ہیں۔ ایسا کہتے ہوئے وہ یہ کہنا نہیں بھولا کہ انڈیا نے امریکی پراڈکٹ پر سب سے زیادہ ٹیرف عائد کر رکھے ہیں۔
انڈیا کو لتاڑنے پر تو چلیں آج کل ہمارا خوش ہونا بنتا ہے۔ لیکن سوچنے کی بات تو ہے کہ ایسی کون سی ہماری بہترین پراڈکٹ ہیں جن کا ٹرمپ بھی مداح ہے۔ ٹرمپ کا کہنا تھا کہ وہ اپنے وعدوں پر عمل کرنے والا شخص ہے، اپنے لوگوں سے میں نے کہہ دیا کہ وہ انڈیا کے ساتھ جنگ بندی کے بعد فوری طور پر پاکستان کے ساتھ ٹریڈ میں اضافہ کریں۔
5 مارچ کو صدر بننے کے بعد اپنے پہلے اسٹیٹ آف دی یونین خطاب میں پاکستان واحد ملک تھا جس کا ڈونلڈ ٹرمپ نے شکریہ ادا کیا۔ پاکستان نے کابل ایئر پورٹ پر 2021 میں خود کش حملے میں مدد کرنے والے دہشتگرد کو پکڑنے میں مدد دی تھی۔ پاک بھارت تناؤ کے دوران بھی اور جنگ بندی کے بعد بھی ٹرمپ کا انداز بیان مودی سرکار کے لیے پریشان کن ہی رہا ہے۔
رئیر ارتھ اور کریٹکل منرل، دفاع اور ٹیکنالوجی میں برتری کے لیے اہم ہیں۔ منرل کی سپلائی چین اور ذخائر پر چین کا کنٹرول ہے۔ ٹرمپ انتظامیہ کی معاشی حکمت عملی میں ‘ری شورنگ’ یعنی منرل کے لیے چین پر انحصار کم کرنا اہم ترجیح ہے۔ پاکستان اپنے معدنی ذخائر کی وجہ سے اہمیت اختیار کرچکا ہے۔
پاکستان اب ڈیجیٹل معیشت کی جانب بڑھ رہا ہے۔ اسٹیٹ بینک اب سنٹرل بینک ڈیجیٹل کرنسی متعارف کرانے پر کام کر رہا ہے۔ بائنانس کے بانی چانگپینگ ژاؤ بھی اس شعبے میں پیش قدمی کے لیے پاکستانی حکومت کو غیر رسمی مشاورت فراہم کر رہے ہیں۔ اس شعبے میں سرمایہ کاری کے لیے پاکستان اپنے آبادی اور معیشت کے سائز کی وجہ سے بھی ایک پرکشش ملک ہے۔
ٹرمپ خاندان سے منسلک ‘ورلڈ لبرٹی فنانشل’ نے پاکستان کرپٹو کونسل کے ساتھ ایک ایم او یو پر بھی سائن کیے ہیں۔ اس کا مقصد پاکستان کو ایک اسٹیبل کوائن کے ذریعے عالمی مالیاتی نظام میں ایک متبادل رسائی فراہم کرنا ہے۔ ٹرمپ کے داماد جئرڈ کشنر بھی اس منصوبے میں دلچسپی لے رہے ہیں۔ کشنر پہلے ہی مڈل ایسٹ میں ایسے ہی ہائی ٹیک سے متعلق سرمایہ کاری منصوبے کامیابی سے چلا رہے ہیں۔
ڈونلڈ ٹرمپ کے دوبارہ انتخاب کے بعد پاکستان نے واشنگٹن کی بڑی لابنگ فرم بی جی آر گروپ کی خدمات حاصل کرلی تھیں۔ اس کے نتیجے میں امریکی محکمہ تجارت اور سرمایہ کاری سے وابستہ کئی اعلیٰ شخصیات، جیسے کہ ڈیوڈ ملر ( یو ایس ایکسپورٹ امپورٹ بنک کے سابق ڈائریکٹر) اور الینا بارٹلیٹ (ٹرمپ کی مہم کی فنانس ڈائریکٹر)، اسلام آباد پہنچیں۔
پاکستانی وزارت تجارت اور منصوبہ بندی کمیشن کے ساتھ ان کی ملاقاتوں میں توانائی، انفراسٹرکچر اور بلاک چین ( کریپٹو، بینک ٹرانزیکشن کی ڈیجیٹل اور محفوظ ٹیکنالوجی ) کے منصوبوں پر بات چیت ہوئی۔ وزیر خزانہ محمد اورنگزیب نے حال ہی میں ایک بیان میں کہا ہے کہ 2000 میگاواٹ بجلی اے آئی ڈیٹا سنٹر اور کریپٹو کے لیے مختص کی جا رہی ہے۔ ڈیٹا سنٹر کے لیے توانائی بنیادی اوربڑی ضرورت ہوتی ہے۔
ٹیکنالوجی میں برتری کے لیے کریٹکل منرل اہم ترین ہیں۔ اب تک یوکرین، روس، کسی حد تک افغانستان اور پاکستان کی منرل سائٹ ہی بڑی حد تک چین سے بچی ہوئی ہیں۔ پاکستان میں گلگت بلتستان، فاٹا، بلوچستان ان سب جگہ یہ ذخائر موجود ہیں۔ امریکا کو اپنی ٹیکنالوجی میں برتری برقرار رکھنی ہے تو پاکستان افغانستان سے صرف منرل ہی نہیں حاصل کرنے بلکہ جاری دہشت گردی اور بدامنی کا خاتمہ بھی کرنا ہے۔
اس حوالے سے ٹرمپ کے ان بیانات کو اہمیت دینے کی ضرورت ہے۔ جن میں وہ پاکستان کو دہشت گردی کے خلاف قابل فخر پارٹنر بتا رہا ہے۔ پاکستان کی یہ نئی اہمیت ہی بتاتی ہے کہ کیوں ٹرمپ انڈیا پر پاکستان کو ترجیح دے رہا ہے اور اسے پاکستان سے کیا کام ہے۔
ادارے کا کالم نگار کی رائے کے ساتھ متفق ہونا ضروری نہیں ہے۔
