پاکستان کا نام روشن کرنے والے قومی ہیرو ارشد ندیم وطن واپس پہنچ گئے ہیں، قومی ہیرو نے گزشتہ روز ایشیئن ایتھلیٹکس چیمپیئن شپ جیولین تھرو میں گولڈ میڈل اپنے نام کیا تھا۔
یہ بھی پڑھیں: بڑی جیت: اولمپیئن ارشد ندیم نے ایشین ایتھلیٹکس چیمپیئن شپ کا ٹائٹل اپنے نام کر لیا
جیولین تھرو فائنل میں ارشد ندیم نے سب سے دور 86.40 میٹر کی تھرو کی تھی، ارشد ندیم نے 52 سال بعد ایشیئن ایتھلیٹکس میں پاکستان کے لیے گولڈ میڈل جیتا، ارشد ندیم نے 2 بھارتی ایتھلیٹس سمیت دیگر کو ہرایا۔
ارشد ندیم نے اولمپکس سمیت مختلف مقابلوں میں پاکستان کے لیے 4 گولڈ میڈلز جیت رکھے ہیں، قومی ہیرو جنوبی کوریا سے وطن واپس پہنچ گئے ہیں، انہوں نے لاہور ایئرپورٹ پر لینڈ کیا، جہاں ڈی جی اسپورٹس بورڈ پنجاب، اہل خانہ اور دوستوں نے ارشد ندیم کا بھرپور استقبال کیا۔
ارشد ندیم ایشین ایتھلٹس میں گولڈ میڈل حاصل کرنے کے بعد لاہور ائیرپورٹ پر پہنچ گئے pic.twitter.com/wosaQx7GNP
— Shakir Mehmood Awan (@ShakirAwan88) June 1, 2025
ڈی جی اسپورٹس بورڈ نے ارشد ندیم کو پھولوں کا ہار پہنایا اور ان کو گلدستہ بھی پیش کیا، اس موقع پر شہریوں کی بڑی تعداد بھی ارشد ندیم کے استقبال کے لیے موجود تھی۔
’بیٹے کو حکومت کی جانب سے بہترین سہولیات دی گئی ہیں‘
لاہور ایئرپورٹ پر میڈیا سے گفتگو کرتے ہوئے قومی ہیرو کی والدہ کا کہنا ہے ’میرے بیٹے نے پہلے بھی ملک کا نام روشن کیا، آج بھی ملک کا نام روشن کرکے آیا ہے۔‘
ان کا کہنا ہے کہ پنجاب حکومت کی جانب سے ارشد ندیم کو بہترین سہولیات دی گئی ہیں جس پر وہ وزیراعلیٰ پنجاب مریم نواز کی شکر گزار ہیں۔
یہ بھی پڑھیں: ارشد ندیم کا والہانہ استقبال اور مجھے نظرانداز کیا گیا، عالمی کراٹے چیمپیئن شاہ زیب رند کا شکوہ
اس موقع پر ارشد ندیم نے گفتگو میں کہا کہ پوری قوم کا شکریہ ادا کرتا ہوں جنہوں نے ہمیشہ عزت دی، ہمیشہ محنت کی ہے، آئندہ بھی پاکستان کے لیے گولڈ میڈل جیتوں گا۔
انہوں نے کہا کہ تقریبا 50 سال بعد ایشیئن ایتھلیٹکس میں پاکستان کے لیے گولڈ میڈل آیا ہے، ورلڈ ایتھلیٹکس میں بھی پاکستان کے لیے گولڈ میڈلز جیتنے کی پوری کوشش کروں گا۔
