ایشین کرکٹ کونسل (اے سی سی) نے ویمنز ایمرجنگ ٹیمز ایشیا کپ کی تاریخ میں تبدیلی کا اعلان کیا ہے۔ یہ ٹورنامنٹ پہلے 6 جون 2025 کو سری لنکا میں شروع ہونے والا تھا۔
اے سی سی کے صدر محسن نقوی نے ایکس پر لکھا کہ سری لنکا کرکٹ بورڈ کے صدر شممی سیلوا کی طرف سے بھیجے گئے خط میں سری لنکا میں موسمی حالات کی ناسازگاری اور چکن گونیا مرض کے پھیلاؤ کے خدشات کے پیش نظر ٹورنامنٹ کی تاریخ کو مؤخر کرنے کی درخواست کی گئی تھی۔
یہ بھی پڑھیے: سعدیہ اقبال ٹی20 کی نمبر ون بولر، پی سی بی چیئرمین محسن نقوی کی جانب سے پذیرائی
اے سی سی کا کہنا ہے کہ وہ خواتین کے کرکٹ کو فروغ دینے اور نئی صلاحیتوں کو نکھارنے کے لیے پرعزم ہے۔
محسن نقوی نے ایک بیان میں کہا کہ ہم خواتین کرکٹرز کے لیے مواقع فراہم کرنے اور ایشیا میں خواتین کے کرکٹ کے مستقبل کے لیے پرعزم ہیں۔ ہم جلد از جلد نئے شیڈول کا اعلان کریں گے۔
