خادمِ حرمین شریفین شاہ سلمان کی حجاج اور امت مسلمہ کے لیے دعا

خادمِ حرمین شریفین شاہ سلمان بن عبدالعزیز نے سوشل میڈیا پر جاری ایک پیغام میں اللہ تعالی کا شکر ادا کیا کہ اُنہیں حرمین شریفین کی خدمت کا شرف حاصل ہے۔

شاہ سلمان نے دعا کی کہ اللہ تعالی حجاجِ کرام کے حج، نسک اور عبادات کو قبول فرمائے اور عیدالاضحیٰ کے اس پُرمسرت موقع پر امتِ مسلمہ اور پوری دنیا کے لیے خیر، سلامتی اور محبت لے کر آئے۔ آخر میں انہوں نے تمام مسلمانوں کو عید کی مبارکباد دی، اور خیریت کی دعا دی۔

نحمد المولى سبحانه وتعالى أن أنعم علينا وشرّفنا بخدمة الحرمين الشريفين، داعين الله سبحانه أن يتقبل من حجاج بيته حجهم ونسكهم وطاعاتهم، وأن يحمل عيد الأضحى المبارك الخير والسلام والمحبة لأمتنا والعالم أجمع.
وكل عام وأنتم بخير.

— سلمان بن عبدالعزيز (@KingSalman) June 6, 2025

2025: حج کے لیے دنیا بھر سے 1,673,230 عازمینِ حج مکہ مکرمہ پہنچے

رواں سال 2025 کے حج کے لیے دنیا بھر سے 1,673,230 عازمینِ حج مکہ مکرمہ پہنچے، جنہوں نے میدانِ عرفات میں وقوف کیا اور مناسکِ حج انتہائی سہولت اور اطمینان کے ساتھ ادا کیے۔

مزید پڑھیں: سعودی ولی عہد کو ایرانی صدر کا فون، عید کی مبارکباد اور حج خدمات پر اظہار تشکر

سعودی وزارتِ حج و عمرہ کے مطابق، اس سال 1,506,576 حجاج بیرونِ ملک سے آئے، جبکہ مملکت کے اندر سے 166,654 حجاج نے فریضۂ حج ادا کیا۔

اعداد و شمار کے مطابق، مجموعی حجاج میں 877,841 مرد اور 795,389 خواتین شامل تھیں۔

سعودی حکومت اور متعلقہ اداروں کی جانب سے حج کے تمام مراحل کے دوران بہترین انتظامات کیے گئے، جس کے نتیجے میں حجاج کرام نے اپنے مناسک انتہائی سہولت اور سکون کے ساتھ ادا کیے۔