سابق وزیر اعظم میاں محمد نواز شریف نے کہا ہے کہ معرکہ حق میں فیلڈ مارشل عاصم منیر کی بہترین جنگی حکمت عملی نے بھارت کے خلاف فتح دلوائی، عاصم منیر فیلڈ مارشل کے عہدہ کے حقدار تھے۔
لندن کی ریجنٹ پارک کی مسجد میں عید الاضحیٰ کی نماز پڑھنے کے بعد سابق وزیر اعظم نے اپنی جماعت کے کارکنوں سے ملاقات کرتے ہوئے وزیراعظم شہباز شریف کی قیادت کو خراج تحسین پیش کیا۔
یہ بھی پڑھیے: لوگ کام کو ووٹ دیتے ہیں، سیاست کے ساتھ ساتھ کام بھی ہونا چاہیے، نواز شریف
انہوں نے کہا کہ وزیراعظم شہباز شریف کی قیادت نے ملک کی معیشت کو بہتر کردیا ہے اور ملک درست جارہا ہے، انہی کی قیادت میں پاکستان نے جنگ جیتی، ملک میں ترقیاتی کام ہورہے ہیں، دعا ہے پاکستان آگے بڑھے اور خوشحالی کی منزلیں طے کرے۔
نواز شریف کا کہنا تھا کہ پنجاب میں وزیراعلیٰ مریم نواز عوام کے لیے انتھک محنت کررہی ہے، انہوں نے نئے منصوبے شروع کیے، سمبڑیال میں بڑے مارجن سے فتح حکومت پر عوامی اعتماد کا اظہار ہے۔
اس موقع پر نواز شریف نے فیلڈ مارشل عاصم منیر کی بھی تعریف کی۔ ان کا کہنا تھا کہ کہ فیلڈ مارشل عاصم منیر کی بہترین جنگی حکمت عملی نے بھارت کے خلاف فتح دلوائی، آرمی چیف نے بھارت کو شکست دی اور وہ فیلڈ مارشل کے عہدہ کے حقدار تھے۔
