گرمی کی شدت برقرار، پنجاب، کشمیر اور پہاڑی علاقوں میں آج بارش کا امکان

ملک بھر میں جمعہ کے روز موسم انتہائی گرم اور خشک رہنے کا امکان ہے، تاہم محکمہ موسمیات نے شمال مشرقی پنجاب، کشمیر اور پہاڑی علاقوں میں تیز ہواؤں اور گرج چمک کے ساتھ بارش کی پیش گوئی کی ہے۔

محکمہ موسمیات کے مطابق اسلام آباد اور گردونواح میں موسم گرم اور جزوی طور پر ابر آلود رہے گا، اور اس دوران 30 فیصد امکانات ہیں کہ چند علاقوں میں بارش اور گرج چمک ہوسکتی ہے۔

ملک کے دیگر علاقوں کی صورتحال

پنجاب: صوبے کے بیشتر اضلاع میں موسم گرم اور خشک جبکہ جنوبی اور مشرقی اضلاع میں دن کے اوقات میں شدید گرمی رہے گی۔ تاہم مری، گلیات، راولپنڈی، جہلم، سیالکوٹ، نارووال، لاہور، گوجرانوالہ اور قریبی علاقوں میں جزوی ابر آلود مطلع کے ساتھ بارش کی توقع ہے۔

خیبرپختونخوا: ہری پور، ایبٹ آباد، مانسہرہ، مالاکنڈ اور کوہستان میں بھی گرج چمک اور بارش کا امکان ہے، باقی علاقوں میں موسم گرم اور خشک رہے گا۔

سندھ: صوبے کے بیشتر اضلاع میں موسم شدید گرم اور مرطوب جبکہ ساحلی علاقوں میں مطلع جزوی ابر آلود رہنے کے ساتھ ساتھ ہلکی بارش یا بوندا باندی کی توقع ہے۔

بلوچستان: بیشتر علاقوں میں موسم شدید گرم اور خشک رہے گا۔

گلگت بلتستان: موسم گرم اور خشک رہنے کا امکان ہے۔

آزاد کشمیر: مطلع جزوی طور پر ابر آلود رہے گا، تیز ہواؤں اور گرج چمک کے ساتھ بارش کی پیش گوئی کی گئی ہے۔

گزشتہ 24 گھنٹوں کا موسم

گزشتہ روز بھی ملک کے بیشتر علاقوں میں موسم گرم اور خشک رہا، جبکہ نارووال میں 1 ملی میٹر بارش ریکارڈ کی گئی۔

زیادہ سے زیادہ درجہ حرارت (جمعرات کو ریکارڈ شدہ):

سبی، جیکب آباد: 49 ڈگری سینٹی گریڈ
دادو: 48 ڈگری
دالبندین، خیرپور، موہنجو داڑو، روہڑی: 47 ڈگری

محکمہ موسمیات کی احتیاطی ہدایات

آج 20 جون کے دوران میدانی علاقوں میں موسم انتہائی گرم رہے گا۔ عوام الناس، خصوصاً بچے، خواتین اور بزرگ افراد کو ہدایت کی گئی ہے کہ وہ:
دوپہر کے اوقات میں دھوپ سے پرہیز کریں
زیادہ پانی پئیں اور خود کو نم رکھیں
بلا ضرورت دھوپ میں باہر نکلنے سے گریز کریں۔