وزیراعظم شہبازشریف نے دولت مشترکہ کے رہنماؤں پر زور دیا ہے کہ وہ اس تنظیم کے رکن ممالک کے درمیان ہم آہنگی پیدا کرنے میں اپنا اپنا کردار ادا کریں۔
وزیر اعظم شہباز شریف نے لندن میں شاہ چارلس سوئم کی تاج پوشی کی تقریب سے قبل دولت مشترکہ کے رہنماؤں کے اجلاس میں شرکت کی۔
اجلاس سے اپنے خطاب میں وزیر اعظم شہباز شریف نے کہا کہ دولت مشترکہ کے رکن ممالک کے مابین ہم آہنگی میں بہتری لانے کی ضرورت ہے تا کہ مشترکہ ترقی کا خواب پورا ہو سکے۔ دولت مشترکہ کے ممالک اس تنظیم کی تقویت میں اپنا اپنا کردار ادا کریں۔
وزیر اعظم نے کہا کہ ان کی حکومت خواتین اور نوجوانوں کو بااختیار بنا رہی ہے اور پسماندہ طبقے جیسا کہ مذہبی اور نسلی اقلیتوں، معذور افراد اور ٹرانس جینڈر کمیونٹی کو مرکزی دھارے میں لا رہی ہے۔
اس سے قبل وزیر اعظم شہباز شریف نے شاہ چارلس سوئم سے خصوصی ملاقات کی۔ وزیر اعظم نے شاہ چارلس سوئم کو دورہ پاکستان کی دعوت بھی دی جبکہ شاہ چارلس نے وزیراعظم سے گفتگو میں اپنے سابقہ دورہ پاکستان کو یاد کیا۔
شاہ چارلس سوئم نے برطانیہ کی ترقی میں کردار ادا کرنے والی پاکستانی کمیونٹی کی بھی تعریف کی اور پاکستانی نوجوانوں اور ہنر مندوں کو بہترین مواقع فراہم کرنے کے لیے اپنی حکومت کے عزم کا بھی ذکر کیا۔
دولتِ مشترکہ کے اجلاس کے موقع پر وزیر اعظم شہباز شریف نے اپنے برطانوی ہم منصب وزیراعظم رشی سونک سے ملاقات میں دونوں ممالک کے درمیان مختلف شعبوں میں دوطرفہ تعلقات کو بڑھانے کی ضرورت پر زور دیا۔
Prime Minister Muhammad Shehbaz Sharif meets British Prime Minister Rishi Sunak on the sidelines of a meeting of the leaders of Commonwealth countries. pic.twitter.com/xTgplf2qTF
— PMLN (@pmln_org) May 5, 2023
وزیر اعظم شہباز شریف سے دولت مشترکہ ممالک کے رہنماؤں کے اجلاس کے موقع پر دولت مشترکہ کی سیکرٹری جنرل پیٹریشیا اسکاٹ لینڈ نے بھی ملاقات کی۔
سیکرٹری جنرل کامن ویلتھ سے گفتگو میں وزیر اعظم کا کہنا تھا کہ پاکستان دولت مشترکہ کے 10ویں اجلاس کی میزبانی کرے گا۔ انہوں نے دولت مشترکہ کے رکن ممالک کو اجلاس میں آنے کی دعوت بھی دی۔
