وفاقی وزیر داخلہ محسن نقوی نے اسلام آباد کے تجارتی مرکز بلیو ایریا میں قائم نادرا 24/7 میگا سینٹر کا غیر اعلانیہ دورہ کیا، جہاں انہوں نے شہریوں کو فراہم کی جانے والی سہولیات کا تفصیلی جائزہ لیا۔ اس موقع پر وزیر داخلہ نے مختلف کاؤنٹرز اور ویٹنگ ایریاز کا معائنہ کیا اور وہاں موجود افراد سے براہ راست گفتگو کی۔
یہ بھی پڑھیں:وزیر داخلہ کا نادرا ہیڈکوارٹرز کا دورہ، شناختی کارڈز اور بائیو میٹرک پالیسی پر اہم فیصلے
محسن نقوی نے شناختی کارڈز اور دیگر اہم دستاویزات کے حصول کے لیے آئے شہریوں کے مسائل سنے۔ بیشتر شہریوں نے نادرا کی سروسز پر اطمینان کا اظہار کیا اور کہا کہ اب انہیں طویل انتظار کا سامنا نہیں کرنا پڑتا، جبکہ عملے کا رویہ بھی خوش اخلاق اور معاون ہے۔ ایک شہری نے ریمارکس دیے کہ آپ کے آنے سے یہاں کے حالات بہتر ہوئے ہیں، عملہ تعاون کر رہا ہے۔
وفاقی وزیر داخلہ محسن نقوی کا نادرا میگا سنٹر بلیو ایریا کا اچانک دورہhttps://t.co/4nwjyFALzB pic.twitter.com/N3ZWIr6hVi
— PTV News (@PTVNewsOfficial) June 28, 2025
وزیر داخلہ نے شہریوں کی مثبت رائے پر نادرا کے شفٹ انچارج اور عملے کی کارکردگی کو سراہا اور انہیں مزید بہتری کے لیے محنت جاری رکھنے کی ہدایت کی۔ انہوں نے چیئرمین نادرا لیفٹیننٹ جنرل محمد منیر افسر اور ان کی ٹیم کی کاوشوں کی بھی تعریف کی۔
مزید پڑھیں:فوج مخالف پیغام شیئر کرنے پر نادرا کی خاتون افسر گرفتار
دورے کے دوران محسن نقوی نے نادرا میں نصب جدید خودکار مشین کا معائنہ بھی کیا اور شناختی کارڈ نمبر اور فنگر پرنٹس کے ذریعے نظام کی کارکردگی کا خود مشاہدہ کیا۔ انہوں نے اطمینان کا اظہار کرتے ہوئے کہا کہ یہ خوشی کی بات ہے کہ شہریوں کو یہاں بغیر انتظار کے سہولت میسر آ رہی ہے، جو ایک مثبت پیش رفت ہے۔
وزیر داخلہ نے موقع پر موجود افسران کو ہدایت کی کہ شناختی کارڈز سے متعلق شہریوں کے تمام مسائل فوری طور پر حل کیے جائیں۔ انہوں نے واضح کیا کہ حکومت شہریوں کی سہولت کے لیے ہر ممکن اقدامات کر رہی ہے اور یہ سلسلہ مستقبل میں بھی جاری رہے گا۔
