پاکستانی گلوکارہ حدیقہ کیانی ان دنوں اپنے بیٹے نادِ علی کے ساتھ اسپین میں چھٹیاں گزار رہی ہیں۔
گلوکارہ حدیقہ کیانی جنہوں نے حال ہی میں اداکاری کے میدان میں بھی اپنی فنکارانہ صلاحیتوں کا اظہار کیا ہے، کم عمری میں ہی اپنی سریلی آواز میں گائیکی کے ذریعہ موسیقاروں اور شائقین کو متاثر کرچکی ہیں۔
حدیقہ کیانی نے ’رقیب سے‘ جیسے بڑے ڈرامے میں اداکاری کے میدان میں قدم رکھنے کا فیصلہ کیا اور اپنی زبردست اداکاری سے سب کو حیران کردیا۔
حدیقہ کیانی ملک کی سب سے کامیاب خواتین موسیقاروں میں سے ایک ہیں اور لوگ انہیں نہ صرف ان کی آواز بلکہ ان کی سماجی خدمت، شفقت اور عاجزی کی وجہ سے بھی پسند کرتے ہیں۔
گلوکارہ کے گزشتہ چند مہینے بہت مصروف گزرے تھے کیونکہ وہ سیلاب زدگان کی بحالی میں مدد کر رہی تھیں اور بہت سے ان لوگوں کے لیے گھر بنانے میں کامیاب ہوئیں جنہوں نے 2022 کے تباہ کن سیلاب میں اپنا سب کچھ کھو دیا تھا۔
حدیقہ کیانی ان دنوں اپنے بیٹے نادِ علی کے ساتھ چھٹیاں گزارنے کے لیے اسپین کے شہر بارسلونا میں موجود ہیں۔
انسٹا گرام پر شیئر کی گئی تصاویر میں حدیقہ کیانی کو اپنے بیٹے کے ساتھ بارسلونا کے سیاحتی مقامات کی سیر کرتے ہوئے دیکھا جاسکتا ہے۔
