ویسٹ انڈیز کرکٹ ٹیم کے ہیڈ کوچ ڈیرن سیمی کو امپائرنگ پر تنقید کرنا مہنگا پڑ گیا، انٹرنیشنل کرکٹ کونسل (آئی سی سی) نے ان پر جرمانہ عائد کر دیا ہے۔
یہ بھی پڑھیں:آئی سی سی کا نیوزی لینڈ کے خلاف سلو اوور ریٹ پر پاکستان کو جرمانہ
میڈیا رپورٹ کے مطابق آئی سی سی نے ڈیرن سیمی کو ضابطہ اخلاق کی خلاف ورزی کا مرتکب قرار دیتے ہوئے ان پر میچ فیس کا 15 فیصد جرمانہ لگایا ہے، ساتھ ہی ایک ڈی میرٹ پوائنٹ بھی ان کے ریکارڈ میں شامل کیا گیا ہے۔
یہ کارروائی آسٹریلیا کے خلاف پہلے ٹیسٹ میچ کے دوسرے روز ہونے والے واقعے کے بعد عمل میں لائی گئی۔
ڈیرن سیمی نے پریس کانفرنس کے دوران امپائرنگ فیصلوں پر کھل کر تنقید کی تھی، جو کہ آئی سی سی کوڈ آف کنڈکٹ کے آرٹیکل 7.2 کے تحت لیول ون کی خلاف ورزی میں آتا ہے۔
آئی سی سی کے مطابق ڈیرن سیمی نے اپنی غلطی کا اعتراف کر لیا ہے، جس کے بعد جرمانے اور ڈی میرٹ پوائنٹ کی سزا سنائی گئی۔
یاد رہے کہ ڈیرن سیمی اس سے قبل پاکستان ٹیم کی کوچنگ کی پیشکش بھی ٹھکرا چکے ہیں اور کرکٹ کے مختلف معاملات پر اپنی بے باک رائے رکھنے کے حوالے سے جانے جاتے ہیں۔
