وفاقی حکومت مسقتبل قریب میں ایران اور عراق جانے والے زائرین کی سہولت کے لیے فیری سروس کا آغاز کرے گی۔
یہ بھی پڑھیں: محرم الحرام میں سیکیورٹی خدشات، پنجاب میں 1421 ذاکرین و مقررین ضلع بند، 809 کی زباں بندی
یہ بات وفاقی وزیر داخلہ محسن نقوی کی زیر صدارت ایران اور عراق جانے والے زائرین کے مسائل کے حل کے لیے قائم ٹاسک فورس کے اجلاس میں بتائی گئی۔
اجلاس میں فیصلہ کیا گیا کہ یکم جنوری 2026 سے زائرین گروپ آرگنائزرز کا نیا سسٹم لاگو ہوگا جس کے بعد سالار سسٹم مکمل طور پر ختم کر دیا جائے گا۔ زائرین صرف گروپ آرگنائزرز سسٹم کے تحت ہی زیارات پر جاسکیں گے۔
اربعین پر خصوصی پروازوں کا اعلان
اس موقعے پر سول ایوی ایشن حکام نے بتایا کہ اربعین پر عراق کے لیے 107 خصوصی پروازیں چلائی جائیں گی۔
بریفنگ میں بتایا گیا کہ ایران کے لیے ہفتہ وار پروازوں کی تعداد 6 سے بڑھا کر 15 کر دی گئی۔
اجلاس میں یہ بھی بتایا گیا کہ ایران اور عراق جانے والے زائرین کے لیے پروازوں کی تعداد مزید بڑھانے پر غور کیا جارہا ہے۔
اربعین کے لیے زمینی راستے کا فیصلہ بعد میں ہوگا
اجلاس میں فیصلہ کیا گیا کہ عاشورہ کے بعد اربعین کے لیے سیکیورٹی صورتحال کا دوبارہ جائزہ لیا جائے گا جس کے بعد ہی زمینی راستے سے سفر کا فیصلہ کیا جائے گا۔
اس موقعے پر محسن نقوی نے کہا کہ زائرین کو کسی بھی قسم کی پریشانی سے محفوظ رکھنا حکومت کی ترجیح ہے اور زائرین کی حفاظت سب سے زیادہ عزیز ہے۔
مزید پڑھیے: محرم الحرام کے دوران سیکیورٹی انتظامات : ایف سی ہیڈکوارٹرز کوئٹہ میں اہم کانفرنس
وفاقی وزرا سردار یوسف، چوہدری سالک اور وزیر مملکت طلال چوہدری نے بھی اجلاس میں شرکت کی۔ واضح رہے کہ خصوصی ٹاسک فورس وزیراعظم شہبازشریف کے احکامات پر بنائی گئی ہے۔
