عوامی نیشنل پارٹی (اے این پی) کو ایک اور بڑا دھچکا لگا ہے، سابقہ سیکریٹری اطلاعات اور سابقہ ایم پی اے ثمر ہارون بلور مسلم لیگ ن میں شامل ہوگئیں۔ وزیرِ اعظم محمد شہباز شریف سے ثمر ہارون بلور، سعیدہ جمشید اور جمشید مہمند نے اسلام آباد میں ملاقات کی۔
مشیر وزیرِ اعظم رانا ثناء اللہ، وفاقی وزیر امورِ گلگت بلتستان و کشمیر اور صوبائی صدر مسلم لیگ ن خیبر پختونخوا انجینئیر امیر مقام، وفاقی وزیر مذہبی امور سردار یوسف، وزیرِ برائے پبلک افیئرز یونٹ رانا مبشر اور مسلم لیگ ن کے صوبائی جنرل سیکریٹری مرتضی جاوید عباسی بھی ملاقات میں شریک تھے۔
ثمر ہارون بلور نے ملکی معاشی استحکام، عوام دوست بجٹ اور ملکی معاشی ترقی کی درست سمت پر وزیرِ اعظم کی قیادت کو خراج تحسین کرتے ہوئے کہا کہ چاہتی ہوں کہ وفاق اور پنجاب کی طرز پر خیبرپختونخوا بھی ترقی کی راہ پر گامزن ہو۔
ثمر ہارون بلور کا وزیرِ اعظم اور پارٹی قیادت کے ساتھ مل کر خیبر پختونخوا کے عوام کی خدمت کا اعادہ کیا۔
اس موقع پروزیرِ اعظم نے ثمر ہارون کا پارٹی میں خیر مقدم کیا مستقبل کیلئے نیک خواہشات کا اظہارکرتے ہوئے وزیرِ اعظم کا ثمر ہارون بلور کے عوامی خدمت کے جذبے کی تعریف کی۔
یہ بھی پڑھیے 5 سال قبل شوہر کو کھونے والی ثمر ہارون بلور کس طرح مہم چلا رہی ہیں؟
ثمر ہارون بلور اے این پی میں اہم کردار ادا کرتی رہی ہیں۔ وہ اے این پی کی صوبائی سیکریٹری اطلاعات اور رکن صوبائی اسمبلی بھی رہ چکی ہیں۔
ان کے شوہر ہارون بلور بھی اے این پی کے اہم رہنما تھے، جو 10 جولائی 2018 کو پشاور میں ہونے والے بم دھماکے میں جاں بحق ہوگئے تھے۔ اس بم دھماکے میں 20 افراد کی جان گئی اور 48 سے زائد زخمی ہوئے تھے۔ کالعدم تحریک طالبان پاکستان (ٹی ٹی پی) نے اس حملے کی ذمہ داری قبول کی تھی۔
واضح رہے کہ ثمر ہارون بلور کے سسر بشیر بلور بھی 2012 میں ایک خودکش حملے میں جاں بحق ہوگئے تھے۔
یہ بھی پڑھیے بلور خاندان کی سیاست سے کنارہ کشی، غلام بلور نے پشاور کو خیرباد کیوں کہا؟
ثمر ہارون بلور کی پارٹی چھوڑنے کی خبر اے این پی کے لیے ایک سنگین دھچکا سمجھی جا رہی ہے، اور سیاسی حلقوں میں اس فیصلے سے متعلق مختلف قیاس آرائیاں بھی کی جا رہی ہیں۔
