اٹلی کے یانک سنر نے ومبلڈن 2025 کے فائنل میں شاندار کارکردگی کا مظاہرہ کرتے ہوئے دفاعی چیمپیئن کارلوس الکاراز کو 4 سیٹوں میں شکست دے کر اپنے کیریئر کا پہلا ویمبلڈن ٹائٹل جیت لیا۔
آل انگلینڈ کلب کے تاریخی سینٹر کورٹ پر کھیلا گیا یہ فائنل 3 گھنٹے اور 4 منٹ تک جاری رہا۔ الکاراز نے پہلا سیٹ 4-6 سے جیت کر اپنی برتری قائم کی مگر اس کے بعد سنر نے غیرمعمولی کم بیک کرتے ہوئے اگلے تینوں سیٹس 6-4، 6-4، 6-4 سے اپنے نام کر لیے۔
سنر کی فتح کے بعد اسٹیڈیم میں جذباتی منظر دیکھنے کو ملا جب وہ اپنی جیت کا جشن اپنے اہلِ خانہ کے ساتھ منانے پہنچے۔ ان کی والدہ، والد اور قریبی دوستوں نے انہیں گلے لگا کر مبارکباد دی جب کہ اسٹیڈیم میں موجود ہزاروں شائقین نے کھڑے ہو کر تالیاں بجائیں۔
یہ بھی پڑھیے: ٹینس اسٹار طلحہ وحید نے سروسز کا عالمی ریکارڈ قائم کردیا
الکاراز جو پچھلے 2 سالوں سے ومبلڈن چیمپیئن رہے ہیں، نے میچ کے بعد اعتراف کیا کہ سنر آج بہتر کھلاڑی تھے۔ ان کا کہنا تھا کہ میں نے اپنا سب کچھ دیا، لیکن سنر نے کمال کا کھیل پیش کیا۔ وہ جیت کے حقدار تھے۔
اس فتح کے بعد سنر نہ صرف ومبلڈن چیمپیئن بن گئے ہیں بلکہ انہوں نے گراس کورٹ پر اپنی برتری بھی ثابت کر دی ہے جو ماضی میں ان کی کمزوری سمجھی جاتی تھی۔
