بھارت میں جنسی ہراسانی کے خلاف خواتین ریسلرز کے دھرنے میں کسان بھی شامل ہو گئے ہیں۔
بھارت کے دارالحکومت نیو دہلی میں جنتر منتر کے مقام پر بھارتی خواتین ریسلرز کا دھرنا 10 روز سے جاری ہے۔ خواتین ریسلرز جنسی ہراسانی پر ریسلنگ ایسوسی ایشن کے صدر برج بھوشن شرن سنگھ کے خلاف کارروائی کا مطالبہ کر رہی ہیں۔ ان خواتین ریسلرز کی حمایت میں کسان بھی دھرنے میں شامل ہو گئے ہیں۔
بھارتی میڈیا کے مطابق بھارتیہ کسان یونین کے کسان پیر کو جنتر منتر کے مقام پر پہنچے جہاں پہلوان 23 اپریل سے ریسلنگ فیڈریشن آف انڈیا (ڈبلیو ایف آئی) کے سربراہ برج بھوشن شرن سنگھ کے خلاف احتجاج کر رہے ہیں۔
ڈی سی پی نئی دہلی پرناو طائل کے مطابق کسانوں کا ایک گروہ جنتر منتر گیا۔ پولیس ٹیم نے کسانوں کے خواتین کے دھرنے میں داخلے کو آسان بنانے کے لیے رکاوٹیں ہٹا دیں، اور کسان دھرنے کے مقام پر پہنچ گئے۔
اس سے قبل دہلی پولیس نے اتوار کے روز جنتر منتر تک کسانوں کے مارچ کے راستے میں 2000 سے زیادہ اہلکار تعینات کیے تھے تاکہ کسانوں کو خواتین ریسلرز کے دھرنے میں شامل ہونے سے روکا جا سکے۔ دہلی پولیس کے مطابق لوگوں کو اپنی نجی گاڑیوں اور بسوں میں دہلی میں داخل ہونے کی اجازت ہے نہ کہ ٹریکٹر ٹرالیوں سے۔
دوسری جانب اتوار کو پہلوانوں نے اپنے مطالبات منوانے کے لیے مودی حکومت کو 21 مئی کی ڈیڈ لائن دی ہے۔ کھاپ، کسان اور خواتین تنظیموں کے تقریباً 2000 حامیوں کی موجودگی میں پہلوان ساکشی ملک اور ونیش پھوگاٹ نے کہا کہ وہ انصاف کے حصول کے لیے طویل جہدوجہد کے لیے تیار ہیں۔
ڈبلیو ایف آئی کے سربراہ برج بھوشن شرن سنگھ نے کسان لیڈروں پر زور دیا ہے کہ وہ ‘غلطی’ نہ کریں اور تحقیقات کے نتائج کا انتظار کریں۔
واضح رہے کہ بھارت کے دارالحکومت نیو دہلی میں جنتر منتر کے مقام پر بھارتی خواتین ریسلرز کا دھرنا 10 روز سے جاری ہے۔ خواتین ریسلرز جنسی ہراسانی پر ریسلنگ ایسوسی ایشن کے صدر برج بھوشن شرن سنگھ کے خلاف کارروائی کا مطالبہ کر رہی ہیں۔
