چین کے شہر تیانجن میں شنگھائی تعاون تنظیم کے وزرائے خارجہ اجلاس کے موقع پر پاکستان کے نائب وزیراعظم و وزیر خارجہ سینیٹر اسحاق ڈار نے ایران کے وزیر خارجہ سید عباس عراقچی سے ملاقات کی، جس میں دونوں رہنماؤں نے دوطرفہ تعلقات، علاقائی امن و امان اور حالیہ جغرافیائی سیاسی پیش رفت پر تفصیلی تبادلہ خیال کیا۔
ملاقات میں پاکستان اور ایران کے درمیان مختلف شعبوں میں تعاون کا جائزہ لیا گیا، جب کہ حالیہ دنوں اسرائیل کی جانب سے ایران پر ہونے والی جارحیت کے بعد پیدا ہونے والی علاقائی صورتحال پر بھی گفتگو ہوئی۔
نائب وزیراعظم اسحاق ڈار نے ایرانی حکومت اور عوام سے پاکستان کی مکمل یکجہتی کا اعادہ کیا اور کہا کہ پاکستان خطے میں امن و استحکام کا خواہاں ہے۔ انہوں نے زور دیتے ہوئے کہا کہ مسائل کے حل اور کشیدگی کے خاتمے کے لیے مکالمہ اور سفارت کاری ہی واحد مؤثر راستہ ہیں۔
دونوں وزرائے خارجہ نے اس بات پر اتفاق کیا کہ موجودہ چیلنجز کے پیش نظر باہمی مشاورت اور تعاون کو مزید فروغ دینا ناگزیر ہے، تاکہ خطے کو پائیدار امن کی جانب گامزن کیا جا سکے۔
