بالی ووڈ کے مشہور جوڑے، کیارا اڈوانی اور سدھارتھ ملہوترا کے ہاں ایک بیٹی کی پیدائش ہوئی ہے۔
جیسے ہی بیٹی کی پیدائش کی خبر آئی، مداحوں نے سوشل میڈیا پر خوشی کا اظہار کیا اور سدھارتھ کو ایک پیار کرنے والے والد کے روپ میں یاد کیا۔ مداحوں کو سدھارتھ کا وہ انٹرویو بھی یاد آ گیا جس میں انہوں نے بیٹی کے باپ بننے کی خواہش ظاہر کی تھی۔
ایک انٹرویو کے دوران سدھارتھ نے کامیڈین ذاکر خان سے بات کرتے ہوئے بتایا تھا کہ ہم دو بھائی ہیں اور میری والدہ ہمیشہ کہتی تھیں کہ کوئی تو شادی کرو تاکہ بچے ہوں۔ پھر میرے بڑے بھائی کا بچہ ہوا، اور وہ بھی لڑکا ہے، صرف ایک بھتیجا ہے۔ میری ماں کو ابھی بھی امید ہے کہ خاندان میں ایک لڑکی ہو۔
Finally Rimma Mam's wish came true! ✌🏻#SidharthMalhotra pic.twitter.com/Zg4pntX0An
— SID KI FAN 🥀 (@oscars_daddy_2) July 15, 2025
اس پرانی ویڈیو کے دوبارہ منظر عام پر آنے کے بعد مداحوں نے سوشل میڈیا پر مختلف تبصرے کیے اور کہا کہ سدھارتھ ملہوترا کی ماں کی خواہش آخر کار پوری ہو گئی، ملہوترا خاندان میں کئی نسلوں کے بعد ایک بیٹی پیدا ہوئی ہے، اس خوبصورت جوڑے کو مبارک ہو۔
سوشل میڈیا پر صارفین نے نئے والد کو ’گرل-ڈاڈ‘ کلب میں خوش آمدید کہتے ہوئے ’اسٹوڈنٹ آف دی ایئر‘ کے ساتھی اداکاروں عالیہ بھٹ اور ورون دھون کو بھی یاد کیا کہ تینوں اسٹارز بیٹیوں کے والدین بن چکے ہیں۔ عالیہ بھٹ کی بیٹی کا نام راہا ہے، جبکہ ورون دھون کی بیٹی کا نام لارا ہے۔
واضح رہے کہ سدھارتھ اور کیارا کی محبت کا آغاز فلم شیرشاہ کے دوران ہوا تھا، بعدازاں یہ آن اسکرین محبت حقیقی محبت میں بدل گئی، کیارا اور سدھارتھ کی شادی 7 فروری 2023 کو راجستھان کے شاندار سیورہ گڑھ پیلس میں ہوئی تھی۔ رواں سال فروری میں جوڑے نے سوشل میڈیا پوسٹ کے ذریعے جلد ننھے مہمان کی آمد کی خوشخبری کا اعلان کیا تھا۔
