مشہور بھارتی ماہرِ غذائیت رُجوتا دیویکر نے انکشاف کیا ہے کہ اداکارہ کرینہ کپور خان گزشتہ 18 برسوں سے تقریباً ایک جیسی غذا کھا رہی ہیں۔ ایک حالیہ انٹرویو میں رُجوتا نے بتایا ’ہم نے 2007 میں کام کا آغاز کیا، اور تب سے اب تک وہ وہی چیزیں کھاتی ہیں۔‘
رُجوتا دیویکر، جن کی پہلی کتاب Don’t Lose Your Mind, Lose Your Weight کرینہ کپور کے مشورے پر شائع ہوئی، نے کرینہ کی روزمرہ غذا کی تفصیل بیان کی:
صبح کا آغاز: بادام، کشمش یا انجیر بھگو کر کھاتی ہیں
ناشتہ: پراٹھا یا پوہا (چاول سے تیار ہلکا پھلکا ناشتہ
دوپہر کا کھانا: اگر شوٹنگ پر ہوں تو دال چاول، کیونکہ چاول زیادہ آسانی سے ہضم ہو جاتا ہے؛ گھر پر ہوں تو روٹی سبزی۔
شام کا ناشتہ: چیز ٹوسٹ یا آم کا ملک شیک یا آم (اگر موسم میں ہو)۔
رات کا کھانا: کھچڑی یا پلاؤ، اور ہفتے میں کم از کم 4 سے 5 دن کھچڑی اور گھی کھاتی ہیں۔
دال چاول اور کھچڑی کے جسم پر اثرات اور سائنسی پہلو
ماہرِ غذائیت گرما گوئل کے مطابق، دال چاول میں پروٹین اور کاربوہائیڈریٹس کی متوازن مقدار پائی جاتی ہے، جو اسے ایک مکمل اور صحت مند غذا بناتی ہے۔
’دال چاول پر گھی ڈال کر کھانا جسم کے لیے توانائی، غذائیت، اور سکون بخش comfort food ہے۔ چاول میں جو امائنو ایسڈ (lysine) کی کمی ہوتی ہے، وہ دال پوری کر دیتی ہے۔‘
گرما گوئل نے بتایا کہ یہ غذا پٹھوں کی مضبوطی، جسمانی نشوونما، اور میٹابولزم کو بہتر کرتی ہے۔ دالوں میں آئرن، وٹامن بی، کیلشیم، اور اگر خود اُگائی جائیں تو وٹامن سی بھی شامل ہو جاتا ہے۔ چاول چونکہ گلوٹن فری ہوتا ہے، اس لیے یہ نظامِ ہضم کے لیے بھی مفید ہے۔
یہ بھی پڑھیں مگنیشیم سپلیمنٹ کے جادو اثر فوائد کیا کیا ہیں؟
مزید بہتری کے لیے گوئل نے تجویز دی کہ کھچڑی میں ہیِنگ (اسافوٹیڈا) اور زیرہ کا تڑکا لگایا جائے، تو یہ ہاضمے کے لیے بہتر ہوتا ہے اور گیس کے مسائل سے بھی بچاتا ہے۔
کرینہ کپور کی سادہ مگر مسلسل اور متوازن غذا نے ثابت کیا کہ طویل مدتی فٹنس مہنگے یا فینسی کھانوں کی مرہونِ منت نہیں، بلکہ غذائیت سے بھرپور سادہ کھانے جیسے دال چاول اور کھچڑی سے بھی صحت مند اور پائیدار طرزِ زندگی اپنایا جا سکتا ہے۔
