نیشنل سائبر کرائم انویسٹی گیشن ایجنسی لاہور زون نے سابق وزیراعظم عمران خان کی ہمشیرہ علیمہ خان کو ریاست مخالف سوشل میڈیا سرگرمیوں کے الزام میں طلب کرلیا۔
یہ بھی پڑھیں: عمران خان کی پارٹی کو ذاتی لڑائیاں ختم کرکے تحریک چلانے کی ہدایت، علیمہ خان
ذرائع کے مطابق علیمہ خان کو 17 جولائی 2025 کو صبح 11 بج کر 30 منٹ پر ذاتی حیثیت میں گلبرگ ٹو لاہور میں واقع دفتر میں پیش ہونے کی ہدایت دی گئی ہے۔
نوٹس کے مطابق علیمہ خان سے ان کے دفاع میں بیان ریکارڈ کرنے کے لیے طلب کیا جا رہا ہے۔ یہ کارروائی انکوائری نمبر 2531/25 مورخہ 27 مئی 2025 کے تحت کی جا رہی ہے۔
ذرائع کا کہنا ہے کہ علیمہ خان پر الزام ہے کہ وہ سوشل میڈیا پر ریاست مخالف سرگرمیوں میں ملوث رہی ہیں، جس کی تحقیقات جاری ہیں۔
نوٹس میں متنبہ کیا گیا ہے کہ اگر علیمہ خان طلبی کے باوجود پیش نہ ہوئیں تو یہ تصور کیا جائے گا کہ ان کے پاس اپنے دفاع میں پیش کرنے کو کچھ نہیں ہے، اور اس کے نتیجے میں قانونی کارروائی کو مزید آگے بڑھایا جائے گا۔
یہ بھی پڑھیں: عمران خان کو خیبرپختونخوا حکومت نے نہیں، پورے سسٹم نے مائنس کیا، علیمہ خان
ذرائع نے مزید بتایا کہ نیشنل سائبر کرائم انویسٹی گیشن ایجنسی وزارت داخلہ کے ماتحت کام کرنے والا ادارہ ہے، اور طلبی پر عمل نہ کرنے کی صورت میں علیمہ خان کے خلاف تعزیراتِ پاکستان کی دفعہ 174 کے تحت کارروائی کی جا سکتی ہے۔
