الاسکا کے جزیرے سینڈ پوائنٹ کے قریب گزشتہ روز 7.3 شدت کا زلزلہ آیا، جس کے بعد نیشنل ویدر سروس (NWS) نے سونامی کی وارننگ جاری کر دی۔ بعد ازاں اس وارننگ کو کم کرتے ہوئے سونامی ایڈوائزری میں تبدیل کر دیا گیا۔
یہ بھی پڑھیں:انڈونیشیا کے تانیمبر جزائر میں 6.8 شدت کا زلزلہ، سونامی کا خدشہ مسترد
میڈیا رپورٹس کے مطابق زلزلے کا مرکز سینڈ پوائنٹ کے جنوب میں تقریباً 54 میل کے فاصلے پر تھا، جو کہ پاپوف آئی لینڈ کے شمال مغرب میں واقع ہے اور انکوریج شہر سے 600 میل جنوب مغرب میں واقع ہے۔
سونامی ایڈوائزری الاسکا کے جنوبی ساحلی علاقوں اور الاسکا پیننسولا سے کینیڈی انٹریس اور یونیماک پاس تک کے بحرالکاہل کے ساحلی علاقوں کے لیے جاری کی گئی ہے۔
سینڈ پوائنٹ کے علاوہ کولڈ بے اور کوڈیئک جیسے شہروں کو بھی اس ایڈوائزری میں شامل کیا گیا ہے۔
کوڈیئک پولیس کے مطابق شہر میں سائرن بجائے گئے جو لوگوں کو بلندی پر منتقل ہونے کی ہدایت دیتے ہیں۔ اگر سونامی کا کوئی اثر پڑتا ہے تو اس کے مقامی وقت کے مطابق دوپہر 2:40 بجے تک پہنچنے کی توقع ہے۔
پولیس کے مطابق ابھی تک زلزلے سے کسی قسم کے نقصان کی اطلاع نہیں ملی۔
زلزلہ کیوں آتاہے؟
زلزلہ کیوں آتاہے؟ اس کی کیاسائنسی وجوہات ہیں، ماہرین ارضیات اس بارے میں کیاکہتے ہیں؟
زیر زمین ارضیاتی پلیٹیں یا بڑی بڑی چٹانیں جب شدید دباؤکے تحت ٹوٹتی اور سرکتی ہیں تو زمین کی سطح پر اس کے شدید اثرات نمودارہوتے ہیں، جنہیں زلزلے کا نام دیاجاتا ہے۔
زلزلے کا مرکزی مقام محور کہلاتا ہے جبکہ محورکے عین اوپرکے مقام کو زلزلے کا مرکز یا ایپی سنٹر کہا جاتا ہے۔
3 طرح کی لہریں زلزلے کا باعث بنتی ہیں
ماہرین کے مطابق 3 طرح کی لہریں زلزلے کا باعث بنتی ہیں جنہیں سائنس مک ویوز کہا جاتا ہے۔ انہیں پی، ایس اور ایل ویو بھی کہاجاتا ہے۔ یہ لہریں محور سے تمام اطراف میں پھیلتی ہیں۔
زلزلے سے ہونے والے نقصان کا انحصار اس کی زیر زمین گہرائی اور شدت پرہوتاہے سطح زمین سے گہرائی جتنی کم ہوگی سطح زمین کے اوپر تباہی اتنی ہی زیادہ ہوگی۔
