پاکپتن کی تھانہ صدر پولیس نے سابق خاتون اوّل بشریٰ بی بی اور خاور مانیکا کے بیٹے موسیٰ مانیکا کو اقدامِ قتل کے مقدمے میں عدالت میں پیش کر دیا، جہاں اسپیشل مجسٹریٹ پاکپتن نے ملزم کو 14 روزہ جوڈیشل ریمانڈ پر جیل بھیجنے کا حکم دے دیا۔
واقعے کی تفصیلات
پولیس کے مطابق، موسیٰ مانیکا نے پاکپتن کے نواحی گاؤں پیر غنی کوٹھی میں اپنے ملازم علی بہادر کو کام میں تاخیر پر فائرنگ کرکے زخمی کر دیا۔ فائرنگ کے بعد موسیٰ مانیکا نے ہوائی فائرنگ بھی کی اور زخمی کو اٹھانے سے انکار کر دیا۔
یہ بھی پڑھیں بشریٰ بی بی اور خاور مانیکا کے بیٹے نے جلد کام نہ کرنے کے’جرم‘ میں ملازم کو گولی مار دی
پولیس کا کہنا ہے کہ واقعے کے فوراً بعد ڈی پی او پاکپتن جاوید اقبال چدھڑ نے نوٹس لیتے ہوئے ملزم کو گرفتار کر لیا، اور موقع پر بھاری پولیس نفری روانہ کر دی گئی۔ زخمی ملازم کو تشویشناک حالت میں اسپتال منتقل کیا گیا ہے۔
اسلحہ برآمد، قانون کی عملداری کا عزم
ڈی پی او جاوید چدھڑ کے مطابق ملزم موسیٰ مانیکا سے آلہ جرم (اسلحہ) بھی برآمد کر لیا گیا ہے۔ مجرم کتنا ہی بااثر کیوں نہ ہو، قانون سب کے لیے برابر ہے۔ ملزمان سے آہنی ہاتھوں سے نمٹا جائے گا، اور کوئی بھی شخص قانون سے بالاتر نہیں۔
