معروف ٹیک کمپنی ایپل نے یوٹیوب پر ٹیکنالوجی سے متعلق خبریں دینے والے مشہور انفلوئنسر جان پروسر پر الزام لگایا ہے کہ اس نے کمپنی کا خفیہ آپریٹنگ سسٹم iOS 26 غیرقانونی طور پر حاصل کرکے قبل از وقت افشا کیا۔
یہ بھی پڑھیں:ٹرمپ میڈیا کا مصنوعی ذہانت کی دنیا میں قدم، 2 ایپلیکیشنز کے لیے درخواست دیدی
ایپل نے فیڈرل عدالت، ناردرن ڈسٹرکٹ آف کیلی فورنیا میں مقدمہ دائر کرتے ہوئے دعویٰ کیا ہے کہ پروسر اور اس کے ساتھی مائیکل راماچیوتی نے کمپنی کے ٹریڈ سیکرٹس چرائے اور کمپیوٹر فراڈ اینڈ ابیوز ایکٹ کی خلاف ورزی کی۔
2 ماہ پہلے لیک، ایپل کو شدید نقصان
ایپل کے مطابق اس کے نئے آپریٹنگ سسٹم iOS 26 کو 9 جون 2025 کو عالمی ڈویلپرز کانفرنس میں باضابطہ طور پر متعارف کرایا گیا، مگر پروسر نے اس کی اہم تفصیلات دو ماہ پہلے ہی یوٹیوب چینل ’فرنٹ پیج ٹیک‘ پر افشا کر دی تھیں۔
ایپل کا الزام: راماچیوتی نے فون تک رسائی حاصل کی
ایپل کا مؤقف ہے کہ پروسر اور راماچیوتی نے مل کر ایپل کے ایک سابق ملازم، ایتھن لپنک کے ترقیاتی فون (Development iPhone) تک رسائی حاصل کی، جو کمپنی کی ملکیت تھا۔ اس فون پر iOS 19 کی آزمائشی ورژن موجود تھا، جسے بعد میں iOS 26 کے طور پر جاری کیا گیا۔
ایپل کا کہنا ہے کہ انہیں 4 اپریل کو ایک گمنام اطلاع ملی تھی کہ پروسر یا راماچیوتی میں سے کسی نے ایتھن لپنک سے فیس ٹائم کال کے ذریعے بات کی اور خفیہ معلومات حاصل کیں۔
اس اطلاع میں یہ بھی کہا گیا کہ پروسر کے پاس اس کال کی ویڈیو بھی موجود ہے، جس میں iOS 26 کے نئے لاک اسکرین، ہوم اسکرین، ایپ اینیمیشنز اور یوزر انٹرفیس کے فیچرز دیکھے جا سکتے ہیں۔
یہ بھی پڑھیں:ایپل کا 2026 کا منصوبہ: نیا بجٹ آئی فون، آئی پیڈز اور میکس متعارف ہوں گے
پروسر کی تردید: میں نے سازش نہیں کی
جان پروسر نے ان الزامات کی سختی سے تردید کی ہے۔ انہوں نے سوشل میڈیا پلیٹ فارم X (سابقہ ٹوئٹر) پر لکھا:
’یہ سب کچھ میری جانب سے ایسے نہیں ہوا۔ میں نے کسی کے فون تک رسائی حاصل کرنے کی کوئی منصوبہ بندی نہیں کی، نہ ہی میرے پاس کوئی پاس کوڈ تھا۔ مجھے علم نہیں تھا کہ معلومات کیسے حاصل کی گئی۔‘
انہوں نے کہا کہ وہ ایپل سے بات کرنے کے منتظر ہیں اور اس معاملے کو واضح کرنا چاہتے ہیں۔
ایپل کا مؤقف: مالی نقصان اور قانونی چارہ جوئی
ایپل کا کہنا ہے کہ اس لیک سے کمپنی کو 5000 ڈالر سے زائد کا مالی نقصان ہوا ہے، اور وہ عدالت سے جرمانے، تادیبی کارروائی اور خفیہ معلومات واپس یا تلف کروانے کی درخواست کر رہی ہے۔
