بلوچستان میں پسند کی شادی کرنے والے جوڑے کے قتل کا مقدمہ درج کرکے ایک شخص کو گرفتار کیا گیا ہے۔
وزیر اعلیٰ بلوچستان میر سرفراز بگٹی نے سماجی رابطے کی ویب سائٹ ‘ایکس’ پر واقعہ سے متعلق بتایا ہے کہ ابتدائی تحقیقات میں یہ بات سامنے آئی ہے کہ یہ افسوسناک واقعہ عید سے چند روز قبل پیش آیا تھا جس کی ویڈیو حال ہی میں منظر عام پر آئی۔
یہ بھی پڑھیے: بلوچستان: مرد و خاتون کے بہیمانہ قتل کی ویڈیو وائرل، وزیراعلیٰ کا نوٹس، ملزمان کی فوری گرفتاری کا حکم
انہوں نے لکھا کہ ویڈیو سامنے آنے کے بعد اس گھناؤنے جرم پر پولیس کو فوری کارروائی کی ہدایت کی گئی جس پر ریاست کی مدعیت میں دہشتگردی کی دفعات کے تحت مقدمہ درج کر لیا گیا ہے اور لڑکی کے قتل میں ملوث ایک مشتبہ قاتل کو گرفتار کیا جا چکا ہے جبکہ دیگر ملزمان کی تلاش جاری ہے۔
وزیر اعلیٰ نے کہا کہ اس وحشیانہ واقعے پر قانون اپنا راستہ لے گا۔ انہوں نے متعلقہ حکام کو ہدایت کی ہے کہ کیس کو مکمل سنجیدگی سے آگے بڑھایا جائے تاکہ مجرموں کو قانون کے مطابق سخت ترین سزا دلوائی جا سکے۔
مزید پڑھیے: لڑکی کی محبت میں جنس تک تبدیل کرانے والے کے ہاتھوں معشوقہ کا بہیمانہ قتل
ترجمان بلوچستان حکومت شاہد رند کے مطابق وزیراعلیٰ نے قانون نافذ کرنے والے اداروں کو ہدایت کی ہے کہ واقعے کے مقام کی فوری نشاندہی کی جائے اور اس میں ملوث تمام ملزمان کو جلد از جلد قانون کے کٹہرے میں لایا جائے۔
وزیراعلیٰ سرفراز بگٹی نے واقعے پر شدید افسوس کا اظہار کرتے ہوئے کہا ہے کہ اس نوعیت کی درندگی نہ صرف ناقابل برداشت ہے بلکہ معاشرتی اقدار اور انسانی وقار کی صریح توہین ہے۔ انہوں نے واضح کیا کہ ریاست کی رٹ کو چیلنج کرنے والوں سے سختی سے نمٹا جائے گا اور کسی کو بھی قانون ہاتھ میں لینے کی اجازت نہیں دی جا سکتی۔
