وفاقی وزیر مملکت برائے داخلہ طلال چوہدری نے کالعدم تحریک طالبان پاکستان (ٹی ٹی پی) کی دہشتگردی اور پیغام رسانی کے لیے استعمال ہونے والے واٹس ایپ چینل کو بے نقاب کردیا ہے اور عالمی برادری سمیت واٹس ایپ انتظامیہ سے اس کے خلاف فوری کارروائی کا مطالبہ کیا ہے۔
سماجی رابطے کی ویب سائٹ ’ایکس‘ پر جاری بیان میں طلال چوہدری نے انکشاف کیاکہ امریکا اور اقوام متحدہ کی جانب سے دہشتگرد قرار دی گئی تنظیم ٹی ٹی پی واٹس ایپ پر اپنا چینل چلا رہی ہے۔ اس کے ذریعے وہ بڑے پیمانے پر انتہا پسندانہ اور نفرت انگیز پیغامات بھیج رہی ہے تاکہ اپنے شدت پسند بیانیے کو فروغ دے اور دہشتگردی کی کارروائیوں کا جواز پیش کر سکے۔
TTP (UN & US designated terrorist organisation) is operating its WhatsApp channels and sending Bulk WhatsApps messages to proliferate its violent / hateful ideology, to spread its harmful narratives, and for glorification of its terror activities.
Pakistan has zero tolerance for… pic.twitter.com/4h3iKHE7OD— Senator Tallal Chaudry (@TallalPMLN) July 20, 2025
وزیرمملکت نے واضح کیاکہ پاکستان نے دہشتگرد گروپوں کے حوالے سے ’زیرو ٹالرنس‘ کی پالیسی اختیار کر رکھی ہے اور عالمی امن کے لیے بے شمار قربانیاں دی ہیں۔ ان کا کہنا تھا کہ ایسے عناصر کے خلاف مشترکہ کوششیں ناگزیر ہیں۔
انہوں نے عالمی برادری اور واٹس ایپ انتظامیہ سے مطالبہ کیاکہ وہ ایسے عناصر کے خلاف مؤثر اقدامات اٹھائیں۔
طلال چوہدری نے زور دیا کہ اس نوعیت کے اکاؤنٹس کو بند کرنے، ان کی خودکار نشاندہی کے لیے الگورتھمز بنانے اور نمبروں کو معطل کرنے کا جامع نظام قائم کیا جانا چاہیے۔
وزیر مملکت نے اپنے بیان کے ساتھ دہشتگردوں کے واٹس ایپ اکاؤنٹس کی تفصیلات بھی فراہم کی ہیں تاکہ متعلقہ ادارے فوری اقدامات کر سکیں۔
