صدر مملکت آصف علی زرداری نے سعودی نیول چیف وائس ایڈمرل محمد بن عبدالرحمان کو ایوان صدر میں نشان پاکستان (ملٹری) عطا کیا۔
یہ بھی پڑھیں: پاک بحریہ کے جہاز یمامہ کی سعودی عرب میں دو طرفہ مشق میں شرکت
ایوان صدر کی پریس ریلیز کے مطابق پاکستان اور سعودی عرب کے دفاعی تعلقات کی علامت کے طور پر صدر مملکت آصف علی زرداری نے ایوان صدر میں ہونے والی ایک تقریب میں چیف آف رائل سعودی نیول فورسز اسٹاف، وائس ایڈمرل محمد بن عبدالرحمان الغریبی کو ملک کے اعلیٰ ترین فوجی اعزازات میں سے ایک، نشان پاکستان(ملٹری) سے نوازا۔
یہ اعزاز وائس ایڈمرل الغریبی کو ان کی پیشہ ورانہ خدمات، پاکستان بحریہ اور رائل سعودی نیول فورسز کے درمیان برادرانہ تعلقات کے فروغ میں نمایاں کردار ادا کرنے پر دیا گیا۔ تقریب میں پاکستان کی مسلح افواج کے سینیئر افسران نے شرکت کی۔
تقریب کے بعد سعودی نیول چیف نے صدر مملکت سے ملاقات کی۔ صدر پاکستان نے انہیں اعزاز حاصل کرنے پر مبارکباد دی اور دونوں ممالک کی بحری افواج کے مابین تعاون کے فروغ کے لیے ان کی خدمات کو سراہا۔ ملاقات میں مملکت سعودی عرب کے سفیر، جناب نوّاف سعید المالکی بھی موجود تھے۔
اس موقعے پر صدر مملکت نے کہا کہ پاکستان، سعودی عرب کے ساتھ اپنے تعلقات کو انتہائی اہمیت دیتا ہے اور مشکل وقتوں میں سعودی عرب کی طرف سے حمایت پر حکومت اور پاکستانی عوام دل سے شکرگزار ہیں۔
مزید پڑھیے: نسیم البحرپاکستان، سعودی عرب کی بحری افواج کے درمیان گہرے تعلقات کا عکاس ہیں، نواف بن سعید
انہوں نے پاکستان بحریہ اور رائل سعودی نیول فورسز کے مابین جاری تعاون پر اطمینان کا اظہار کرتے ہوئے اسے مزید وسعت دینے کی ضرورت پر زور دیا۔
صدر مملکت نے فروری 2025 میں منعقدہ مشترکہ بحری مشق ’امن-25‘ اور ’امن ڈائیلاگ-25‘ میں سعودی بحریہ کی شرکت کو سراہا اور کہا کہ ایسی سرگرمیاں بحری تعاون اور باہمی ہم آہنگی کے فروغ میں کلیدی کردار ادا کرتی ہیں۔
صدرِ پاکستان نے ولی عہد شہزادہ محمد بن سلمان کے وژن کی تعریف ہوئے کہا کہ ان کی قیادت مملکت کو ترقی، خوشحالی اور مثبت تبدیلی کی جانب لے جا رہی ہے۔
انہوں نے رائل سعودی نیول فورسز کی جانب سے پاکستان نیوی کے تربیتی نظام پر اعتماد کو سراہتے ہوئے دونوں بحری افواج کے مابین تربیتی تعاون کو مزید وسعت دینے کی اہمیت پر زور دیا۔
مزید پڑھیں: پاک بحریہ کے پہلے ملجم کلاس جنگی جہاز پی این ایس بابرکا سعودی بندرگاہ کا دورہ
آخر میں صدرِ مملکت نے وائس ایڈمرل محمد بن عبدالرحمن الغریبی سے کہا کہ وہ خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کو ان کی جانب سے دلی نیک تمنائیں اور خیرسگالی کا پیغام پہنچائیں اور پاکستان و سعودی عرب کے مابین گہرے، برادرانہ اور تاریخی تعلقات کے اعادے کا اظہار کیا۔
یاد رہے کہ پاکستان اور سعودی عرب کے مابین دفاعی تعلقات تاریخی بنیادوں پر استوار ہیں اور دونوں ممالک باقاعدگی سے تربیتی مشقوں، اعلیٰ سطحی تبادلوں، اور عسکری تعاون میں شریک رہتے ہیں۔
