پتر جایا (ملائیشیا): کمبوڈیا اور تھائی لینڈ کے درمیان سرحدی تنازع پر حالیہ خونریز جھڑپوں کے خاتمے کے لیے پیر کو ملائیشیا میں جنگ بندی مذاکرات ہو رہے ہیں۔ مذاکرات میں امریکی صدر ڈونلڈ ٹرمپ کی تجویز پر پیش رفت کی جا رہی ہے، جبکہ چین بھی مذاکرات میں شریک ہے۔
یہ بھی پڑھیں:تھائی لینڈ، کمبوڈیا لڑائی نے پاک بھارت تنازع کی یاد دلا دی، جنگ بندی کا خواہاں ہوں، ٹرمپ
کمبوڈیا کے وزیراعظم ہن مانت اور تھائی لینڈ کے قائم مقام وزیراعظم پھومتھم ویچایہ چائی کے درمیان ہونے والے ان مذاکرات کا مقصد فوری جنگ بندی اور امن کی راہ ہموار کرنا ہے۔
تھائی حکومت نے کمبوڈیا کی نیت پر شکوک ظاہر کیے ہیں اور کہا ہے کہ کمبوڈین فوج کی طرف سے حملے جنگ بندی کی سنجیدگی پر سوال اٹھاتے ہیں۔ ادھر امریکا اور چین دونوں فریقین کے درمیان ثالثی کردار ادا کر رہے ہیں۔
یہ بھی پڑھیں:تھائی لینڈ اور کمبوڈیا کا سرحدی تنازع شدت اختیار کر گیا، ایک دوسرے پر فضائی حملے اور راکٹ باری
فوجی جھڑپیں جمعرات سے جاری ہیں، جن میں اب تک 34 افراد ہلاک اور 134,000 سے زائد بے گھر ہو چکے ہیں، جبکہ تقریباً 4 لاکھ کمبوڈین مزدور تھائی لینڈ سے واپس لوٹ چکے ہیں۔
