مارشل آرٹس کو بچپن کے بدمعاشوں سے بچنے کے لیے سیکھنے والا نوجوان آج دنیا کا تیز ترین پنچ مارنے والا انسان بن چکا ہے۔ 23 سالہ جوشوا لیالا نے 3 گنیز ورلڈ ریکارڈز قائم کرکے عالمی سطح پر اپنا لوہا منوا لیا ہے۔
جوشوا نے 7 سال کی عمر میں خود پر ہونے والے اسکول کے ظلم و ستم سے بچنے کے لیے تائیکوانڈو سیکھنا شروع کیا۔ وقت کے ساتھ ساتھ اس نے نہ صرف خود اعتمادی حاصل کی بلکہ مارشل آرٹس کو بطور کیریئر اپنایا۔ آج وہ اپنی مکسڈ مارشل آرٹس کمپنی بنانے کے ساتھ ساتھ انسٹاگرام اور ٹک ٹاک پر 9 لاکھ 82 ہزار فالوورز کے ساتھ ایک ابھرتے ہوئے سوشل میڈیا اسٹار بھی ہیں۔
عالمی ریکارڈز کی تفصیل:
01: بغیر دستانے کے مکمل پنچز (60 سیکنڈ میں 453 پنچز)
02: دستانے پہن کر مکمل پنچز(60 سیکنڈ میں 374 پنچز)
03: ڈمبلز کے ساتھ مکمل پنچز(60 سیکنڈ میں 333 پنچز)
مزید پڑھیں: گنیز بک آف ورلڈ ریکارڈز: بوبی سے معمر ترین کتے کا ٹائٹل کیوں چھینا جا رہا ہے؟
جوشوا کا کہنا ہے کہ 2021 میں اس نے سوشل میڈیا پر باقاعدگی سے مواد پوسٹ کرنا شروع کیا، جس نے چند ہی ہفتوں میں 2 ہزار سے 2 لاکھ ویوز حاصل کیے اور یوں وہ 3 مختلف نوکریاں کرتے ہوئے اپنی پہچان بنانے میں کامیاب ہو گیا۔
اب جوشوا نہ صرف ایک ریکارڈ ہولڈر فائٹر ہے بلکہ نئی نسل کے لیے ایک متاثرکن شخصیت بھی بن چکا ہے جو یہ پیغام دے رہا ہے کہ مشکلات کا سامنا ہمت اور محنت سے ہی کیا جا سکتا ہے۔
