ورلڈ چیمپیئن شپ آف لیجنڈز (WCL) 2025 کے سیمی فائنل میں بڑا موڑ سامنے آگیا ہے، جہاں انڈیا چیمپیئنز کی جانب سے میچ نہ کھیلنے کے فیصلے کے بعد پاکستان چیمپیئنز بغیر کھیلے ہی فائنل میں پہنچ گئے ہیں۔
ٹورنامنٹ کے منتظمین نے بدھ کے روز تصدیق کی کہ انڈیا چیمپیئنز نے پاکستان چیمپیئنز کے خلاف سیمی فائنل کھیلنے سے انکار کر دیا ہے۔ اس فیصلے کی وجہ ’عوامی جذبات‘ کو قرار دیا گیا ہے۔
یہ بھی پڑھیں لیجنڈز لیگ، پاکستان کے خلاف سیمی فائنل کھیلنے سے بھارت کا انکار، بھارتی میڈیا
انڈیا چیمپیئنز نے گروپ مرحلے میں ویسٹ انڈیز کو بڑے مارجن سے شکست دے کر سیمی فائنل میں جگہ بنائی تھی، اور وہ پاکستان چیمپیئنز کے خلاف ایک ہائی وولٹیج مقابلے کے لیے کوالیفائی کر چکے تھے۔ تاہم، میچ کنفرم ہونے کے بعد ہی غیر یقینی صورتحال نے جنم لیا، جس کا انجام دستبرداری کی صورت میں نکلا۔
ٹورنامنٹ آرگنائزرز نے ایک بیان میں کہا کہ ہم کھیل کی طاقت پر یقین رکھتے ہیں جو دنیا میں مثبت تبدیلی لا سکتی ہے۔ تاہم، عوامی جذبات کا احترام ہمارے لیے اولین ترجیح ہے۔ انڈیا چیمپیئنز کے فیصلے کا احترام کرتے ہیں، اور پاکستان چیمپیئنز کی تیاری کو بھی سراہتے ہیں۔
اب پاکستان چیمپیئنز فائنل میں جنوبی افریقہ یا آسٹریلیا چیمپیئنز کے خلاف ہفتہ کو مدِمقابل ہوں گے۔
یاد رہے کہ گروپ مرحلے میں پاکستان چیمپیئنز نے 5 میچز میں 9 پوائنٹس حاصل کرتے ہوئے سرفہرست پوزیشن حاصل کی تھی، جبکہ انڈیا چیمپیئنز چوتھی پوزیشن پر رہی تھی۔
یہ بھی پڑھیں: شاہد آفریدی کا خوف، پاک بھارت لیجنڈز کرکٹ میچ منسوخ، شائقین میں شدید مایوسی
یہ پہلا موقع نہیں ہے کہ انڈیا چیمپیئنز نے پاکستان کے خلاف کھیلنے سے انکار کیا ہو — وہ گروپ مرحلے میں بھی اسی فیصلے کے تحت میدان میں نہ اُترے تھے۔
اب تمام نگاہیں ہفتہ کو ہونے والے فائنل پر مرکوز ہیں، جہاں پاکستان چیمپیئنز ٹائٹل کے دفاع کے لیے میدان میں اتریں گے۔
