ویسٹ انڈیز نے دوسرے ون ڈے میں پاکستان کو 5 وکٹوں سے شکست دے کر 3 میچوں کی سیریز ایک، ایک سے برابر کر دی۔ بارش سے متاثرہ میچ ڈک ورتھ لوئس میتھڈ کے تحت 37 اوورز فی اننگز تک محدود ہوا، جس میں میزبان ٹیم نے 181 رنز کا ہدف 33.2 اوورز میں حاصل کرلیا۔
پاکستان نے پہلے بیٹنگ کرتے ہوئے 7 وکٹوں پر 171 رنز بنائے۔ حسن نواز 36 رنز کے ساتھ نمایاں رہے، جبکہ حسین طلعت نے 31 اور عبداللہ شفیق نے 26 رنز اسکور کیے۔ ویسٹ انڈیز کی جانب سے جےڈن سیلز نے شاندار بولنگ کرتے ہوئے 23 رنز کے عوض 3 وکٹیں حاصل کیں۔
مزید پڑھیں: پاکستان بمقابلہ ویسٹ انڈیز دوسرا ون ڈے، بارش کے باعث میچ 40 اوورز تک محدود
ہدف کے تعاقب میں ویسٹ انڈیز کے راسٹن چیز نے 47 گیندوں پر 49 رنز کی ناقابلِ شکست اننگز کھیل کر جیت میں مرکزی کردار ادا کیا، جبکہ شیرفین ردرفورڈ نے 45 رنز کی جارحانہ اننگز کھیلی۔ محمد نواز نے 17 رنز کے عوض 2 وکٹیں حاصل کیں۔
راسٹن چیز کو آل راؤنڈ کارکردگی پر میچ کا بہترین کھلاڑی قرار دیا گیا۔ سیریز کا تیسرا اور فیصلہ کن میچ 13 اگست کو کھیلا جائے گا۔
