وفاقی وزیر اطلاعات و نشریات عطااللہ تارڑ کی ہدایت پر خیبرپختونخوا میں شدید بارشوں، سیلابی صورتحال اور قیمتی جانی نقصان کے پیش نظر وزارتِ اطلاعات کے زیر اہتمام ایف 9 پارک اسلام آباد میں 16 اور 17 اگست کو ہونے والا ’معرکہ حق اور جشنِ آزادی‘ کے حوالے سے پروگرام ملتوی کردیا گیا۔
وفاقی وزیر اطلاعات عطاء اللہ تارڑ کی ہدایت پر خیبر پختونخوا میں شدید بارشوں، سیلابی صورتحال اور قیمتی جانی نقصان کے باعث وزارتِ اطلاعات کے زیر اہتمام ایف-9 پارک اسلام آباد میں 16 اور 17 اگست کو “معرکہ حق اور جشنِ آزادی کے حوالے سے منعقد ہونے والا پرگرام ملتوی کر دیا گیا
1/3— Attaullah Tarar (Office) (@AttaTararoffice) August 15, 2025
وزارتِ اطلاعات کے ترجمان کے مطابق یہ فیصلہ ملک میں جاری بارشوں اور سیلاب سے متاثرہ افراد سے اظہارِ یکجہتی اور ریلیف سرگرمیوں پر مکمل توجہ مرکوز رکھنے کے پیش نظر کیا گیا ہے۔
ترجمان نے کہاکہ اس وقت ملک کے مختلف حصوں میں جاری قدرتی آفات کے متاثرین کی مدد کے لیے پوری قوم کو متحد ہو کر کام کرنا ہوگا۔
ان کا کہنا تھا کہ آزادی کی تقریبات ملتوی ضرور کی گئی ہیں، تاہم انہیں بعد ازاں مزید جوش و جذبے اور بڑے پیمانے پر منعقد کیا جائے گا۔
واضح رہے کہ خیبرپختونخوا اس وقت شدید سیلاب کی لپیٹ میں ہے۔ اب تک مختلف حادثات میں 200 سے زیادہ افراد جاں بحق ہو چکے ہیں، جبکہ امدادی سرگرمیوں میں مصروف صوبائی حکومت کا ایک ہیلی کاپٹر بھی کریش کر گیا ہے، جس کے نتیجے میں 5 افراد شہید ہوگئے۔
