آسٹریلیا کے سابق ٹیسٹ کپتان اور مشہور کوچ بوب سمپسن 89 برس کی عمر میں انتقال کر گئے۔ ان کے انتقال کی تصدیق کرکٹ آسٹریلیا اور مقامی میڈیا اداروں نے کی۔
یہ بھی پڑھیں:شاہین شاہ آفریدی نے ون ڈے کرکٹ میں نیا عالمی ریکارڈ اپنے نام کرلیا
سمپسن نے اپنے کیریئر میں 62 ٹیسٹ میچوں میں آسٹریلیا کی نمائندگی کی اور 4,869 رنز بنائے جن میں 10 سنچریاں شامل ہیں۔ وہ 1960 اور 70 کی دہائی میں اپنی جارحانہ بیٹنگ اور شاندار فیلڈنگ کے لیے جانے جاتے تھے۔
ان کا سب سے یادگار لمحہ 311 رنز کی تاریخی اننگز تھی، جس نے انہیں کھیل کے بڑے بیٹسمینوں میں شامل کیا۔ کپتانی کے بعد بوب سمپسن نے کوچنگ کے شعبے میں بھی نمایاں خدمات انجام دیں۔
یہ بھی پڑھیں:5 گیندوں پر 5 شکار: کرٹس کیمفر نے ٹی20 کرکٹ کا نیا ریکارڈ بنا ڈالا
1980 کی دہائی کے آخر میں جب آسٹریلوی کرکٹ بحران سے گزر رہی تھی تو انہوں نے ٹیم کو سنبھالا اور سخت ڈسپلن اور ٹیم ورک کے ذریعے 1987 کا ورلڈ کپ جتوانے میں کلیدی کردار ادا کیا۔
بعد ازاں ان کی کوچنگ ہی نے آسٹریلوی ٹیم کی بنیاد رکھی جس نے 1990 اور 2000 کی دہائی میں عالمی کرکٹ پر حکمرانی کی۔
کرکٹ آسٹریلیا نے اپنے بیان میں کہا کہ بوب سمپسن نہ صرف ایک عظیم بیٹسمین اور کپتان تھے بلکہ ایک غیر معمولی کوچ بھی، جنہوں نے آسٹریلوی کرکٹ کو نئی جہت دی۔
دنیا بھر کے کرکٹ حلقوں نے ان کے انتقال پر گہرے دکھ اور افسوس کا اظہار کیا ہے اور ماہرین کے مطابق بوب سمپسن کی خدمات کرکٹ کی تاریخ میں ہمیشہ یاد رکھی جائیں گی۔
