بلوچستان کے مختلف اضلاع میں موسلادھاربارشوں اورسیلابی ریلوں نے تباہی مچادی، جس کے نتیجے میں جانی اورمالی نقصانات کی اطلاعات موصول ہوئی ہیں۔
پی ڈی ایم اے بلوچستان کے مطابق ضلع ہرنائی میں چھت گرنے سے 2 افراد جاں بحق ہوگئے جبکہ ہرنائی کے علاقے گوچینہ میں 3 افراد سیلابی ریلے میں بہہ گئے، ریسکیو ٹیموں نے 2 افراد کو زندہ بچا لیا ہے جبکہ ایک بچے کی تلاش کے لیے ریسکیو آپریشن جاری ہے۔
یہ بھی پڑھیں:بلوچستان حکومت نے گلگت بلتستان اور خیبر پختونخوا کے سیلاب متاثرین کے لیے امدادی سامان روانہ کردیا
ادھر سوراب میں بارش اور سیلابی ریلے کے باعث 115 سے زائد گھروں کو نقصان پہنچا ہے، جبکہ بعض علاقے شدید متاثر ہوئے ہیں۔ پی ڈی ایم اے کے مطابق ہرنائی میں ایک گھر مکمل طور پر تباہ ہوگیا ہے۔
دوسری جانب کوئٹہ-سبی قومی شاہراہ این 65 پر واقع بی بی نانی پل بولان دریا میں طغیانی کے باعث شدید متاثر ہوا ہے، جس کے بعد کوئٹہ اور سندھ کو ملانے والی یہ اہم شاہراہ ٹریفک کے لیے بند کردی گئی ہے، پی ڈی ایم اے نے شہریوں اور ڈرائیور حضرات کو متبادل راستے اختیار کرنے کی ہدایت کرتے ہوئے غیر ضروری سفر سے گریز کا مشورہ دیا ہے۔
مزید پڑھیں:14 اگست کو سیکیورٹی اداروں نے بلوچستان کو بڑی تباہی سے بچایا، وزیراعلیٰ سرفراز بگٹی کا انکشاف
پی ڈی ایم اے حکام کے مطابق ضلعی انتظامیہ اور نیشنل ہائی وے اتھارٹی شاہراہ کی بحالی کے لیے فوری اقدامات کررہی ہیں جبکہ متاثرہ علاقوں میں ریسکیو اور امدادی کارروائیاں جاری ہیں۔
محکمہ موسمیات نے آئندہ 24 گھنٹے تک صوبے کے بیشتراضلاع میں بارشوں کا امکان ظاہرکیا ہے۔
