کراچی میں منگل کی صبح سے مختلف علاقوں میں موسلا دھار بارش کا سلسلہ جاری ہے جس کے باعث اربن فلڈنگ کی صورتحال پیدا ہوگئی ہے اورمختلف حادثات میں کم از کم 8 شہری جاں بحق جبکہ 2 زخمی ہوگئے ہیں۔
بارشوں کے باعث شہر کے متعدد حصوں میں بجلی کی فراہمی معطل ہوگئی جبکہ سڑکیں زیرِ آب آنے سے ٹریفک کی روانی متاثر ہوئی ہے۔ دوسری طرف شہر میں موبائل فون اور انٹرنیٹ سروس بھی متاثر ہوگئی ہے۔
یہ بھی پڑھیے: خیبرپختونخوا میں بارشوں اور سیلاب سے 358 افراد جاں بحق، پی ڈی ایم اے رپورٹ جاری
وزیراعلیٰ سندھ مراد علی شاہ نے بارشوں کے باعث کل بدھ کو کراچی میں عام تعطیل کا اعلان کردیا جبکہ میئر کراچی مرتضیٰ وہاب نے شہر میں ایمرجنسی نافذ کردی ہے۔ جاری نوٹیفکیشن میں کہا گیا کہ تمام لازمی سروسز محکموں کی چھٹیاں منسوخ کر دی گئی ہیں اور عملے کو ہمہ وقت دستیاب رہنے کی ہدایت کی گئی ہے۔
موسلادھار بارش کی وجہ سے 600 سے زائد فیڈرز ٹرپ کرگئے جس سے کئی علاقوں میں بجلی کی ترسیل بند ہوگئی جبکہ گلشنِ حدید، قائد آباد، لانڈھی، ملیر اور لیاقت آباد سی ون ایریا کے علاقے میں بارش کا پانی گھروں میں داخل ہوگیا ہے۔
یہ بھی پڑھیے: ’18 سالہ کارکردگی کا پول ایک بار پھر کھل گیا‘، بارش کے بعد کراچی ڈوبنے پر پیپلز پارٹی پر شدید تنقید
گلستانِ جوہر بلاک 12 میں گھر کی دیوار گرنے سے 4 افراد جاں بحق ہوگئے جن میں خواتین اور بچے بھی شامل ہیں جبکہ اورنگی ٹاؤن میں دیوار گرنے سے ایک بچہ جاں بحق ہوا۔
شہر میں بارشوں کے بعد پیدا ہونے والی صورتحال کے باعث صوبائی حکومت نے کل اسکولز بند رکھنے کا فیصلہ بھی کیا ہے۔
ٹریفک کی صورتحال
کراچی ٹریفک پولیس نے دوپہر کو جاری اپ ڈیٹ میں بتایا کہ مختلف سڑکوں پر ٹریفک کی روانی سست روی کا شکار ہے۔
ٹریفک پولیس نے شہریوں کو ہدایت کی کہ بارش کے دوران اچانک بریک لگانے سے گریز کریں، کم رفتار سے گاڑی چلائیں اور مناسب فاصلے پر رہیں۔
خدمت، یقین، تحفظ، احساس،
بارش میں ٹریفک پولیس روڈ پر ٹریفک کو رواں دواں کرنے میں مصروف عمل*آپ کے سفر میں ہمسفر کراچی ٹریفک پولیس*https://t.co/deUayrWXvz pic.twitter.com/yzgSHoB1Ye
— Karachi Traffic Police (@Khitrafficpol) August 19, 2025
انتظامیہ اور محکمے ہائی الرٹ
سندھ کے چیف سیکریٹری آصف حیدر شاہ نے ضلعی انتظامیہ، پی ڈی ایم اے، محکمہ صحت اور ریسکیو 1122 کو ہائی الرٹ رہنے کی ہدایت دی ہے۔ انہوں نے بارش کا پانی فوری نکالنے اور محکمہ موسمیات سے قریبی رابطے میں رہنے کی ہدایت کی۔
ایسٹ زون پولیس کے ڈپٹی انسپکٹر جنرل ڈاکٹر فاروق علی نے ایس ڈی پی اوز اور ایس ایچ اوز کو ہدایت دی ہے کہ اپنے علاقوں میں موجود رہیں، نکاسی آب یقینی بنائیں، ٹریفک کی روانی برقرار رکھیں اور ہنگامی صورتحال سے نمٹنے کے فوری اقدامات کریں۔
یہ بھی پڑھیے: بلوچستان: موسلادھار بارشوں کے دوران 2 شہری جاں بحق، کوئٹہ سبی شاہراہ متاثر
انہوں نے کہا کہ عوام کی جان و مال کا تحفظ ہر قیمت پر یقینی بنایا جائے، خاص طور پر نشیبی علاقوں میں۔ ریسکیو ٹیموں اور ہیلپ لائنز کو فعال رکھنے کی ہدایت کی گئی۔
مزید بارشوں کا امکان
محکمہ موسمیات کے مطابق دن بھر وقفے وقفے سے بارش کا امکان ہے۔ کم سے کم درجہ حرارت 28 ڈگری سینٹی گریڈ اور نمی 85 فیصد ریکارڈ کی گئی۔
صبح 8 بجے تک سب سے زیادہ بارش سعدی ٹاؤن میں 35.8 ملی میٹر ریکارڈ کی گئی، جبکہ گلشن معمار میں 33.3 ملی میٹر، ناظم آباد میں 26 ملی میٹر، گلشن حدید میں 3 ملی میٹر، یونیورسٹی روڈ پر 4.4 ملی میٹر، کورنگی میں 4.6 ملی میٹر، سرجانی ٹاؤن میں 7 ملی میٹر اور ڈیفنس فیز سیون میں 3 ملی میٹر بارش ریکارڈ کی گئی۔
یہ بھی پڑھیے: خیبر پختونخوا میں بارشوں اور سیلاب سے 314 ہلاکتیں، بونیر سب سے زیادہ متاثر، پی ڈی ایم اے رپورٹ
محکمہ موسمیات نے سندھ کے دوسرے علاقوں تھرپارکر، عمرکوٹ، مٹیاری، ٹھٹھہ، حیدرآباد، بدین، دادو، خیرپور، نوشہرو فیروز، لاڑکانہ، جیکب آباد، سکھر، گھوٹکی، شکارپور، کشمور، شہید بے نظیر آباد، سانگھڑ، اسلام کوٹ، ننگرپارکر اور میرپور خاص میں بھی بارش اور گرج چمک کے امکانات ظاہر کیے ہیں۔
