وزیراعلیٰ پنجاب مریم نواز شریف نے صوبے میں مون سون بارشوں کے ممکنہ آٹھویں اسپیل کے پیش نظر متعلقہ اداروں کو پیشگی اقدامات کرنے کی ہدایت جاری کر دی۔
وزیراعلیٰ نے کہا کہ لاہور، راولپنڈی، ملتان، بہاولپور، ڈیرہ غازی خان، سرگودھا، گجرات اور گوجرانوالہ کے اضلاع میں کمشنرز اور ڈپٹی کمشنرز کو الرٹ رہنا ہوگا۔
پی ڈی ایم اے کے ایس او پیز پر عملدرآمد
وزیراعلیٰ نے کہا کہ پی ڈی ایم اے پنجاب کی جانب سے جاری پیشگی الرٹس اور ایس او پیز پر عملدرآمد یقینی بنایا جائے۔ انہوں نے ہدایت دی کہ ممکنہ سیلابی صورتحال میں امدادی ٹیمیں بروقت متاثرہ علاقوں میں پہنچائی جائیں۔
بروقت انخلا اور آگاہی مہم
وزیراعلیٰ نے ہدایت کی کہ آبادی کے بروقت انخلا کے لیے مساجد اور لاؤڈ اسپیکر پر اعلانات کیے جائیں اور متاثرہ مکینوں کو ایس ایم ایس میسجز کے ذریعے بھی مطلع کیا جائے۔
صحت و علاج کے اقدامات
سیلاب متاثرین کے علاج معالجے کے لیے کلینک آن ویل اور فیلڈ اسپتال متعین کرنے کا حکم دیا گیا ہے جبکہ متاثرہ علاقوں میں مویشیوں کی ویکسی نیشن اور علاج کی سہولت فراہم کرنے کی بھی ہدایت کی گئی ہے۔
دریاؤں کے کنارے ہنگامی اقدامات
وزیراعلیٰ نے پی ڈی ایم اے، انتظامیہ اور اداروں کو دریائے جہلم، چناب، راوی اور ستلج کے کنارے خصوصی انتظامات کی ہدایت دی۔ دریائے ستلج سے ملحقہ علاقوں میں ریسکیو، پولیس اور انتظامیہ کو فوری اقدامات یقینی بنانے اور دریاؤں کے پارٹ میں مقیم آبادیوں کا انخلا فوری طور پر مکمل کرنے کا حکم دیا گیا ہے۔
مال مویشی اور زراعت کے تحفظ کی ہدایت
مریم نواز شریف نے مال مویشیوں کی بروقت منتقلی اور تحفظ کے لیے پیشگی اقدامات کی ہدایت کی۔ ساتھ ہی زراعت، آبپاشی، ہیلتھ، جنگلات، لائیوسٹاک، لوکل گورنمنٹ اور ٹرانسپورٹ محکمے الرٹ رہیں گے۔
