گورنر سندھ کامران ٹیسوری نے سندھ موٹر وہیکلز ترمیمی بل 2025 کی منظوری دے دی ہے، جو فوری طور پر نافذ العمل ہوگیا ہے۔
اس نئے قانون کے تحت ڈرائیونگ لائسنس کے اجرا کے لیے مزید سخت شرائط عائد کی گئی ہیں جبکہ خلاف ورزی کرنے والوں کے خلاف سخت کارروائی اور سزاؤں کا اعلان کیا گیا ہے۔
یہ بھی پڑھیں: رواں سال کراچی میں ٹریفک حادثات میں 489 افراد جاں بحق ہوئے، پولیس چیف
بل کے متن میں کہا گیا ہے کہ شہریوں کی حفاظت کو یقینی بنانے کے لیے یہ قانون سازی کی گئی ہے اور ٹریفک قوانین پر عملدرآمد نہ کرنے والوں کو کسی قسم کی رعایت نہیں دی جائے گی۔
ترمیمی بل کے مطابق بھاری گاڑیوں کے ڈرائیونگ لائسنس کے اجرا کے لیے نئی شرائط شامل کی گئی ہیں۔ ہلکی اور بھاری ٹرانسپورٹ گاڑیوں کا لائسنس حاصل کرنے کے لیے اب لائسنس سے پہلے تربیتی کورس لازمی قرار دیا گیا ہے تاکہ ڈرائیوروں کو عملی اور فنی مہارت دی جا سکے۔
یہ بھی پڑھیں: کراچی میں نئے ٹریفک اور روڈ سیفٹی قوانین کا نفاذ
بل کے حوالے سے گورنر سندھ کامران ٹیسوری نے کہا ہے کہ موٹر وہیکلز بل میں سخت ترامیم کی گئی ہیں، سخت قانون سازی پر عملدرآمد کرایا جائے گا، یہ وہ بل ہے جس کے تحت ہیوی ٹرالے اور دیگر ہیوی ٹریفک پر سخت قانون لاگو ہوگا کہ آٗئندہ کوئی موٹرسائیکل والا کچل نہ دیا جائے۔
گورنر سندھ نے کہا کہ اب ہیوی ٹرالے چلانے کے لیے ڈرائیونگ لائسننس اتنی آسانی سے نہیں ملے گا، ان پر وہ سارے قانون لاگو ہوں گے جن سے ہم معصوم جانوں کو محفوظ رکھ سکیں، میں امید کرتا ہوں کہ اس قانون پر جب عملدرآمد ہوگا تو کوئی موٹر بائیک والا کسی بڑے ٹرالے کے نیچے کچلا نہیں جائے گا۔
