ایران کے سرکاری میڈیا نے دعویٰ کیا ہے کہ سیکیورٹی فورسز نے جنوب مشرقی صوبہ سیستان و بلوچستان میں کارروائی کے دوران اسرائیل سے منسلک ایک مسلح گروہ کے 6 افراد کو ہلاک اور 2 کو گرفتار کر لیا۔
ایرانی خبر رساں ایجنسی ایرنا (IRNA) کے مطابق جھڑپ کے بعد جائے وقوعہ سے ہتھیار اور بارودی مواد بھی برآمد کیا گیا۔ سرکاری ٹی وی پر نشر کی گئی فوٹیج میں 6 ہلاک مسلح افراد کی دھندلی لاشیں دکھائی گئیں۔
ایرانی انٹیلی جنس سروسز کے مطابق گروہ کے پاس ایسی ’دستاویزات‘ موجود تھیں جو ان کے ’صہیونی روابط‘ کو ثابت کرتی ہیں۔ رپورٹ میں مزید بتایا گیا کہ یہ گروہ ایران کے مشرق میں ایک ’اہم تنصیب‘ پر حملے کی منصوبہ بندی کر رہا تھا تاہم اس بارے میں مزید تفصیلات نہیں دی گئیں۔
یہ بھی پڑھیے ایران کے جنوبی شہر زاہدان میں اسرائیل نواز دہشتگردوں کا حملہ، کم از کم 6 افراد جاں بحق، 22 زخمی
حکام کا کہنا ہے کہ کارروائی میں گروہ کے ’مرکزی آپریشنل سیل‘ کو نشانہ بنایا گیا، جس میں 7 غیر ایرانی دہشتگرد شامل تھے، تاہم ان کی شہریت ظاہر نہیں کی گئی۔ جھڑپ کے دوران ایرانی انٹیلی جنس کے 2 اہلکار اور ایک پولیس افسر زخمی بھی ہوئے۔
یہ واقعہ ایسے وقت میں سامنے آیا ہے جب ایک روز قبل صوبہ ایرانشہر میں پولیس پر 2 مسلح حملوں میں 5 اہلکار ہلاک ہو گئے تھے، جب کہ علیحدہ جھڑپ میں مزید ایک پولیس افسر مارا گیا۔
تہران طویل عرصے سے اسرائیل پر الزام عائد کرتا آیا ہے کہ وہ ایران کے اس شورش زدہ خطے میں علیحدگی پسند گروہوں کو اسلحہ اور مالی معاونت فراہم کرتا ہے۔
