فیلڈ مارشل عاصم منیر نے وزیر خارجہ سے ملاقات میں چین کو آہنی دوست قرار دیا: چینی وزارت خارجہ

چینی وزیرِ خارجہ وانگ ای کے دورہ پاکستان کے موقع پر ان کی فیلڈ مارشل سید عاصم منیر سے ملاقات پر چین کی وزارت خارجہ نے اہم بیان جاری کیا ہے، جس میں کہا گیا ہے کہ چیف آف آرمی اسٹاف نے چین کو پاکستان کا آہنی دوست قرار دیا۔

چینی وزارت خارجہ کے مطابق ملاقات کے دوران وزیر خارجہ وانگ ای کا کہنا تھا کہ پاکستانی فوج قومی استحکام کا ستون اور پاک چین دوستی و تعاون کی مضبوط محافظ ہے۔

یہ بھی پڑھیں: فیلڈ مارشل عاصم منیر سے ملاقات، چینی وزیر خارجہ کا پاکستان کی مسلسل حمایت کا عزم

چینی وزیر خارجہ نے کہاکہ پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد کی بھرپور حمایت کی ہے۔

وانگ ای کا کہنا تھا کہ دنیا میں پیدا ہوتے ہوئے غیر یقینی حالات میں مضبوط پاک چین تعلقات کو فروغ دینا علاقائی امن و استحکام کے لیے نہایت سودمند ہے۔

چینی وزیر خارجہ کے مطابق چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔ وقت کے کڑے امتحانات کے باوجود پاک چین تعلقات مزید مضبوط ہوئے، اور دونوں ممالک ایک مضبوط روایتی دوستی قائم کر چکے ہیں۔

وانگ ای کا کہنا تھا کہ چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا، چین عالمی امور میں پاکستان کے بڑے کردار کا خیرمقدم کرتا ہے۔

دونوں ممالک ہمیشہ ایک دوسرے کے دکھ سکھ میں شریک رہے ہیں، فیلڈ مارشل عاصم منیر

چینی وزارت خارجہ کے مطابق اس موقع پر فیلڈ مارشل سید عاصم منیر نے کہاکہ چین پاکستان کا ’آہنی دوست‘ ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں۔

فیلڈ مارشل نے کہاکہ پاک چین اسٹریٹجک شراکت داری چٹان کی طرح مضبوط ہے، چین کے ساتھ دوستانہ تعلقات قائم رکھنا پورے پاکستانی قوم کا متفقہ مؤقف ہے۔

چینی وزارت خارجہ کے مطابق فیلڈ مارشل سید عاصم منیر نے پاکستان کی معاشی اور سماجی ترقی میں قیمتی تعاون پر چین کی قیادت سے اظہارِ تشکر کیا۔

یہ بھی پڑھیں: پاک چین تعلقات کو نقصان پہنچانے کی ہر کوشش ناکام ہوگی، ترجمان دفتر خارجہ

فیلڈ مارشل عاصم منیر نے کہاکہ پاکستانی فوج انسداد دہشتگردی اور سیکیورٹی تعاون کو فعال طور پر فروغ دینے کے لیے تیار ہے۔ پاکستان میں چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی۔

آرمی چیف کا کہنا تھا کہ پاک چین دوستی کو مزید مستحکم بنانے کے لیے اقدامات اور ترقی کی راہ پر سفر جاری رکھا جائے گا۔