بنگلہ دیش کی عبوری حکومت کے سربراہ پروفیسر یونس نے کہا ہے کہ خطے میں ہر ممکن تعاون کے دروازے کھولنے چاہییں، خاص طور پر نوجوانوں کے مابین روابط کو فروغ دینا ضروری ہے۔ وزیراعظم پاکستان شہباز شریف میرا ویژن ایک دوسرے سے مطابقت رکھتا ہے۔
ڈپٹی وزیراعظم و وزیر خارجہ اسحاق ڈار سے ملاقات میں گفتگو کرتے ہوئے انہوں نے کہاکہ میں سارک کی حوصلہ افزائی کرتا ہوں اور پاکستان سمیت رکن ممالک سے تعلقات کو سب سے بڑی ترجیح سمجھتا ہوں۔
یہ بھی پڑھیں: پاکستان نے بنگلہ دیشی طلبہ کو 500 اسکالر شپس دینے کا اعلان کردیا
انہوں نے ثقافتی تبادلوں کو بھی اہم قرار دیا اور کہاکہ جب پاکستانی گلوکار بنگلہ دیش میں پرفارم کرتے ہیں تو لوگ بے حد پسند کرتے ہیں، یہی وہ جذبہ ہے جسے آگے بڑھانے کی ضرورت ہے۔
ڈپٹی وزیراعظم و وزیر خارجہ سینیٹر اسحاق ڈار نے اتوار کو اسٹیٹ گیسٹ ہاؤس جمنہ میں چیف ایڈوائزر پروفیسر محمد یونس سے ملاقات کی۔ اس موقع پر دونوں رہنماؤں نے دوطرفہ تعلقات کے فروغ، تجارت میں اضافے، نوجوانوں کے مابین تبادلوں، تعلیمی و ثقافتی روابط کو مضبوط بنانے اور علاقائی تعاون خصوصاً سارک کو فعال کرنے پر تبادلہ خیال کیا۔
ڈپٹی وزیراعظم اسحاق ڈار نے پروفیسر یونس کو وزیراعظم پاکستان شہباز شریف کی جانب سے نیک تمناؤں کا پیغام پہنچایا جس پر پروفیسر یونس نے ماضی کی ملاقاتوں کا ذکر کرتے ہوئے کہاکہ میری اور وزیراعظم شہباز شریف کی جب بھی ملاقات ہوئی، ہم نے ہمیشہ سارک پر گفتگو کی۔ ہمارا ویژن ایک دوسرے سے مطابقت رکھتا ہے اور دونوں کے لیے سارک اولین ترجیح ہے۔
اسحاق ڈار نے باہمی تعاون کے امکانات پر روشنی ڈالتے ہوئے کہاکہ پاکستان اور بنگلہ دیش کی معیشتیں ایک دوسرے کی تکمیل کرتی ہیں اور بے شمار شعبے ایسے ہیں جہاں دونوں ممالک مل کر کام کر سکتے ہیں۔
انہوں نے پروفیسر یونس کی غربت کے خاتمے اور عوامی فلاح کے لیے خدمات کو خراج تحسین پیش کرتے ہوئے کہاکہ بنگلہ دیش خوش نصیب ہے کہ اسے ایسا رہنما میسر آیا ہے جو دنیا کے لیے مثال ہے۔
اسحاق نے کہاکہ دونوں ممالک کے درمیان فضائی و بحری رابطوں کو بہتر بنانے کے لیے اقدامات جاری ہیں۔ اکتوبر تک فلائی جناح کی جانب سے براہِ راست پروازوں کا آغاز متوقع ہے جبکہ پی آئی اے کی نجکاری کے بعد ڈھاکا کے لیے براہِ راست پروازیں بھی شروع ہوں گی۔
ڈپٹی وزیراعظم نے ڈھاکا قیام کے دوران توانائی و تجارت سے متعلق مشیروں سمیت مختلف سیاسی جماعتوں کے رہنماؤں سے بھی ملاقاتیں کیں۔ ملاقات میں چیف ایڈوائزر کے خصوصی ایلچی برائے بین الاقوامی امور لطفے صدیقی بھی موجود تھے۔
یہ بھی پڑھیں: اسحاق ڈار کی چیف ایڈوائزر بنگلہ دیش پروفیسر یونس سے ملاقات، دوطرفہ تعلقات مضبوط بنانے پر تبادلہ خیال
دونوں رہنماؤں نے اس بات پر اتفاق کیاکہ تجارت میں اضافہ، ثقافتی و تعلیمی تبادلے اور علاقائی تعاون خطے میں امن و خوشحالی کے فروغ کا ذریعہ بن سکتے ہیں۔
