چین کے شہر تیانجن میں منعقدہ شنگھائی تعاون تنظیم (ایس سی او) کے اجلاس میں چینی صدر شی جن پنگ نے رکن ممالک کے لیے ایک ترقیاتی بینک قائم کرنے کی تجویز دی۔
یہ بھی پڑھیں: شنگھائی تعاون تنظیم اجلاس: ایس سی او ڈیولپمنٹ بینک اور فنڈ بنانے پر اتفاق
اس اجلاس میں وزیراعظم پاکستان شہباز شریف، روسی صدر ولادیمیر پیوٹن، ترکیہ کے صدر رجب طیب اردوان، ملائیشیا کے وزیراعظم انور ابراہیم اور اقوام متحدہ کے سیکریٹری جنرل انتونیو گوتریس سمیت کئی عالمی رہنماؤں نے شرکت کی۔
اپنے خطاب کے دوران صدر شی جن پنگ نے کہاکہ شنگھائی تعاون تنظیم باہمی اعتماد اور اصولوں پر استوار ہو کر اب ایک تناور درخت کی شکل اختیار کر چکی ہے۔
انہوں نے اس بات پر زور دیا کہ رکن ممالک کو تجارت، معیشت اور دیگر شعبوں میں تعاون کے مواقع سے بھرپور استفادہ کرنا چاہیے۔
چینی صدر نے مزید کہاکہ مشترکہ خوشحالی کے لیے تجارتی اور مواصلاتی روابط کو فروغ دینا ناگزیر ہے۔ ان کے مطابق چین رکن ممالک کی سماجی و اقتصادی ترقی میں فعال کردار ادا کرنے کے لیے پرعزم ہے اور عملی اقدامات کے بغیر عوامی خوشحالی ممکن نہیں۔
یہ بھی پڑھیں: بھارتی وزیر خارجہ نے ایس سی او اجلاس سے خطاب میں کیا کہا؟
دو روزہ اجلاس میں 20 ممالک کے سربراہان شریک ہوئے۔ اس موقع پر وزیراعظم شہباز شریف نے پاکستان کا مؤقف پیش کرتے ہوئے کہاکہ بلوچستان اور خیبرپختونخوا میں ہونے والی دہشتگردی میں بیرونی ہاتھ ملوث ہونے کے ثبوت موجود ہیں۔
