چیٹ جی پی ٹی کی سروس دنیا بھر میں متاثر

دنیا بھر کے صارفین رپورٹ کر رہے ہیں کہ اوپن اے آئی کا چیٹ بوٹ چیٹ جی پی ٹی صارفین کی جانب سے کیے گئے سوالات کے جواب نہیں دے رہا جس کی وجہ سے ہزاروں صارفین کو مایوسی کا سامنا ہے۔

یہ بھی پڑھیں: نو عمر لڑکے کی خودکشی: اوپن اے آئی کی جانب سے چیٹ جی پی ٹی پر والدین کا کنٹرول متعارف

بدھ کو ویب سائٹس اور آن لائن سروسز میں خلل کی نگرانی کرنے والی ویب سائٹ ڈاؤن ڈیٹیکٹر نے صرف 20 منٹ کے اندرچیٹ جی پی ٹی سے متعلق درجنوں شکایات موصول کیں۔

صارفین نے سوشل میڈیا خصوصاً ایکس پر ’چیٹ جی پی ٹی ڈاؤن کے ہیش ٹیگ کے ساتھ یہ جاننے کی کوشش کی کہ آیا واقعی چیٹ بوٹ میں کوئی مسئلہ درپیش ہے۔

رپورٹس یہ تھیں کہ چیٹ جی پی ٹی صارفین کے پیغامات کا بالکل بھی جواب نہیں دے رہا اور جوابی طور پر صرف خالی پیغام ’بلینک ریپلائی‘ دکھا رہا ہے۔

دنیا بھر میں تعطل کی تصدیق

بین الاقوامی میڈیا میں اس طرح کی رپورٹس شائع ہوئی ہیں۔ دی سن کی رپورٹ کے مطابق بدھ 3 ستمبر کو چیٹ جی پی ٹی نے ایک سروس آؤٹیج کا سامنا کیا اور ہزاروں صارفین نے اس کی جانب سے کام نہ کرنے کی شکایت کی۔ بعد ازاں اوپن اے آئی نے اس کی اصل وجہ معلوم کرلی اور اس کا حل تلاش کیا جا رہا ہے۔

مزید پڑھیے: چیٹ جی پی ٹی کو مؤثر مواد کے لیے انسانوں کی ضرورت پڑگئی

دی اکنامک ٹائمز نے بھی اس واقعے کی تصدیق کی کہ عالمی سطح پر اس تعطل نے صارفین کو شدید مشکلات کا شکار بنایا۔

ٹائمز آف انڈیا نے بھی بتایا ہے کہ صارفین چیٹ جی پی ٹی سے جوابات وصول نہیں کر پا رہے تھے اور ایک خامی پیغام ‘ChatGPT Not Displaying Responses’ سامنے آ رہا تھا۔

ٹامز گائیڈ کے مطابق مسئلہ تقریباً صبح 4:00 ای ایس ٹی / 9:00 بی ایس ٹی کے قریب سامنے آیا اور اوپن اے آئی نے مسئلے کی تصدیق کر کے فوری تحقیقات شروع کیں۔

پاکستان میں بھی سروس سے متعلق شکایات

پاکستان میں چیٹ جی پی ٹی کی سروس اس وقت متاثر رہی۔ صارفین نے سروس کی بندش یا ردعمل نہ دینے کی شکایت کی اور مختلف میڈیا رپورٹس نے بھی اس کی تصدیق کی ہے۔

یہاں یہ بات قابل ذکر ہے کہ یہ پہلا موقع نہیں ہے جب چیٹ جی پی ٹی کو اس طرح کے مسائل کا سامنا کرنا پڑا ہو۔ ماضی میں بھی جب کوئی بڑا اپڈیٹ متوقع ہوتا ہے یا جب صارفین کی تعداد بہت زیادہ ہو جاتی ہے تو ایسے تکنیکی خلل سامنے آ چکے ہیں۔

واضح رہے کہ اپنے آغاز سے لے کر اب تک چیٹ جی پی ٹی نے دنیا بھر میں کروڑوں صارفین کو متوجہ کیا ہے اور روزانہ ڈھائی ارب سے زائد پرامپٹس (سوالات یا ہدایات) موصول کر رہا ہے۔

چیٹ جی پی ٹی کا مؤقف

جب وی نیوز نے چیٹ جی پی ٹی سے رابطہ کیا تو اس کا کہنا تھا کہ ’ہاں سروس واقعی ڈاؤن تھی، بہت سے صارفین نے سروس نہ کام کرنے کی تصدیق کی اور ڈاؤن ڈٹیکٹر پر شکایات میں اچانک اضافہ ہوا اور اوپن اے آئی نے خود بھی مسئلے کی تصدیق کر دی تھی اور حل پر کام جاری ہے۔

مزید برآں، چیٹ جی پی ٹی سے وی نیوز کی اس بات چیت کے دوران ہی اچانک چیٹ بوٹ سے رابطہ منقطع ہوگیا اورSomething went wrong while generating the response کا میسج آنے لگا۔ تاہم ریفریش کرنے کے بعد معاملہ کچھ حل ہوگیا۔