یشیا کپ 2025 کے تیسرے گروپ بی میچ میں بنگلہ دیش نے شاندار بیٹنگ اور اجتماعی بولنگ کے امتزاج سے ہانگ کانگ کو 7 وکٹوں سے شکست دے دی۔
ابوظہبی کے زاید کرکٹ اسٹیڈیم میں ہانگ کانگ نے پہلے بیٹنگ کرتے ہوئے مقررہ 20 اوورز میں 7 وکٹوں پر 143 رنز بنائے۔ جواب میں بنگلہ دیش نے 17.2 اوورز میں ہدف 3 وکٹوں کے نقصان پر بآسانی حاصل کرلیا۔
یہ بھی پڑھیں: ایشیا کپ 2025: پاک بھارت میچ کے ٹکٹوں کی فروخت سست روی کا شکار
بنگلہ دیشی کپتان لٹن داس نے 39 گیندوں پر 59 رنز بنائے، جس میں 6 چوکے اور ایک چھکا شامل تھا۔ انہیں توحید ہردوئے کا بھرپور ساتھ حاصل رہا جنہوں نے ناقابلِ شکست 35 رنز کی ذمہ دارانہ اننگز کھیلی۔ دونوں کے درمیان 95 رنز کی شراکت قائم ہوئی جس نے بنگلہ دیش کی کامیابی یقینی بنادی۔
ہانگ کانگ کی جانب سے نِزاکت خان نمایاں بلے باز رہے جنہوں نے 40 گیندوں پر 42 رنز بنائے، جبکہ کپتان یاسِم مرتضیٰ نے 28 رنز کی جارحانہ اننگز کھیلی۔ وکٹ کیپر ذیشان علی نے بھی 30 رنز کا اضافہ کیا۔
یہ بھی پڑھیں: ایشیا کپ 2025: بھارت نے یو اے ای کو 9 وکٹوں سے شکست دیدی
ابتدائی جھٹکوں کے بعد ہانگ کانگ نے کچھ مزاحمت دکھائی مگر مقررہ اوورز میں صرف 143 رنز بنا سکے۔
بنگلہ دیش کے لیے تنزیم حسن سکّیب، ٹاسکِن احمد اور رشاد حسین نے دو دو وکٹیں حاصل کیں۔ ہانگ کانگ کے عتیق اقبال سب سے کامیاب بولر رہے، جنہوں نے 3.4 اوورز میں 14 رنز کے عوض 2 وکٹیں حاصل کیں۔
بنگلہ دیش نے 10 گیندیں باقی رہتے ہوئے میچ 7 وکٹوں سے جیت لیا اور گروپ بی میں اپنی پوزیشن مزید مستحکم کرلی۔
