وفاقی وزیر تجارت جام کمال خان نے کہا ہے کہ پاکستان سنٹرل ایشیا کا گیٹ وے ہے، ٹرانزٹ ٹریڈ معاہدوں سے تجارتی اخراجات میں نمایاں کمی آئے گی اور خطے میں اقتصادی سرگرمیوں کو فروغ ملے گا۔
وہ اسلام آباد میں 7 آسیان ممالک کے سفرا سے ملاقات کے موقع پر گفتگو کر رہے تھے۔ ملاقات میں پاکستان اور آسیان ممالک کے درمیان تجارتی، سرمایہ کاری اور عوامی روابط بڑھانے پر اتفاق کیا گیا۔
اجلاس میں انڈونیشیا، ملائیشیا، فلپائن، تھائی لینڈ، برونائی، ویتنام اور میانمار کے سفرا شریک ہوئے۔ وزیر تجارت نے آسیان ممالک کو ٹیکنالوجی، ہنر اور انفراسٹرکچر میں شراکت داری کی دعوت دیتے ہوئے کہا کہ آسیان کمپنیوں کے لیے سی پیک کے تحت خصوصی اقتصادی زونز سرمایہ کاری کے بہترین مواقع فراہم کرتے ہیں۔
مزید پڑھیں: کئی ممالک پاکستانی معدنیات میں سرمایہ کاری سے مطمئن ہیں، وزیر تجارت جام کمال خان
جام کمال خان نے وفود کو پاکستان کی نئی تجارتی پالیسی، گاڑیوں کی درآمدی پالیسی اور ٹیرف میں اصلاحات پر بریفنگ دی اور بتایا کہ پہلی بار پاکستان میں ٹریڈ ڈسپیوٹ ریزولوشن کمیشن قائم کیا گیا ہے تاکہ سرمایہ کاروں کو شفاف اور تیز تر سہولت فراہم کی جا سکے۔
ملاقات میں آسیان ممالک کے سفرا نے پاکستان کی معاشی پیشرفت اور استحکام پر اطمینان کا اظہار کیا۔ ملائیشین سفیر نے پاکستانی کمپنیوں کو چِپ میکنگ انڈسٹری میں کردار دینے کی پیشکش بھی کی۔
سفرا نے مذہبی سیاحت، ہنر کے تبادلے اور سپلائی چین شراکت داریوں کو مزید فروغ دینے پر بھی زور دیا۔ اتفاق کیا گیا کہ تجارتی و ادارہ جاتی تعاون بڑھانے کے لیے ایک جامع روڈ میپ تیار کیا جائے گا تاکہ خطے کے عوام کو براہِ راست فائدہ پہنچایا جاسکے۔
