پارلیمنٹ نے چیف جسٹس آف پاکستان عمر عطا بندیال کے خلاف ریفرنس دائر کرنے کا اصولی فیصلہ کرتے ہوئے ریفرنس لانے کی تحریک متفقہ طور پر منظور کرلی ہے۔
اسپیکر راجا پرویز اشرف کی زیر صدارت قومی اسمبلی کا اجلاس ہوا جس میں شازیہ ثوبیہ سومرو نے چیف جسٹس عمر عطا بندیال اور دیگر ججز کے خلاف ریفرنس لانے کی تحریک پیش کی جسے کثرت رائے سے منظور کر لیا گیا ۔
تحریک منظور ہونے کے بعد ریفرنس کی تیاری کے لیے کمیٹی قائم کر دی گئی ہے، کمیٹی میں محسن شاہنواز، خورشید جونیجو، صلاح الدین ایوبی، شہناز بلوچ اور صلاح الدین شامل ہیں۔
اسپیکر قومی اسمبلی راجا پرویز اشرف پارلیمانی کمیٹی کے اراکین میں رد و بدل کر سکیں گے، کمیٹی چیف جسٹس کے علاوہ دیگر ججز کے خلاف بھی مِس کنڈکٹ کے تحت ریفرنس کا مسودہ تیار کرے گی۔
اجلاس میں جناح ہاؤس لاہور پر حملے اور شہداء کی یادگاروں کی بے حرمتی کے خلاف رکن پی ٹی آئی وجیہہ قمر کی پیش کردہ مذمتی قرار داد بھی منظور کی گئی ہے۔