پاکستان اسٹاک ایکسچینج میں جمعہ کو کاروبار کا آغاز تیز رفتار رجحان کے ساتھ ہوا اور بینچ مارک کے ایس ای 100 انڈیکس نے پہلی بار تاریخ میں 161,000 پوائنٹس کی سطح عبور کر لی۔
آج پہلے نصف دن کے کاروبار میں 2,500 سے زائد پوائنٹس کا اضافہ ہوا، دوپہر 12 بجے انڈیکس 161,803.85 پوائنٹس پر مستحکم تھا، جو 2,523.76 پوائنٹس یعنی 1.58 فیصد کا اضافہ ظاہر کرتا ہے۔
یہ بھی پڑھیں:پاکستان اسٹاک مارکیٹ کی تاریخی بلندی کا ملک کی معیشت سے کتنا تعلق ہے؟
سیمنٹ، کمرشل بینکس، تیل و گیس کی کھوج کرنے والی کمپنیاں، آئل مارکیٹنگ کمپنیز، پاور جنریشن اور ریفائنری کے سمیت تمام شعبوں میں خریداری کا رجحان دیکھا گیا۔
Market is up at midday 🚀
⏳ KSE 100 is positive by +2524.88 points (+1.59%) at midday trading. Index is at 161,804.97 and volume so far is 257.14 million shares (12:00 PM) pic.twitter.com/WVixR3HDgr— Investify Pakistan (@investifypk) September 26, 2025
انڈیکس میں وزن رکھنے والے اسٹاکس جیسے اے آر ایل، حبکو، ماری پیٹرولیم، او جی ڈی سی، پاکستان پیٹرولیم لمیٹڈ، پی او ایل، پاکستان اسٹیٹ آئل اور سوئی ناردن گیس پائب لائنز لمیٹڈ سب سبز زون میں ٹریڈ ہوئے۔
ماہرین نے اس تیزی کا سبب پاکستان کی اقتصادی صورتحال میں بہتری قرار دیا کیونکہ اقتصادی بحالی اور پاکستان کی بہتر جغرافیائی سیاسی پوزیشن کی وجہ سے مارکیٹ میں تیزی دیکھنے کو مل رہی ہے۔
واضح رہے کہ اہم عالمی پیش رفت میں وزیراعظم شہباز شریف نے گزشتہ شب وائٹ ہاؤس میں امریکی صدر ڈونلڈ ٹرمپ سے چیف آف آرمی اسٹاف فیلڈ مارشل سید عاصم منیر کے ہمراہ ملاقات کی۔
مزید پڑھیں: اسٹاک ایکسچینج میں تیزی، 100 انڈیکس 159 ہزار پوائنٹس کے قریب پہنچ گیا
مشرق وسطیٰ کی صورتحال پر تبادلہ خیال کرتے ہوئے، وزیراعظم شہباز شریف نے غزہ میں فوری جنگ بندی کے لیے ٹرمپ کی کوششوں کی تعریف کی، خاص طور پر نیویارک میں مسلم دنیا کے اہم رہنماؤں کو مدعو کرنے کی حالیہ پہل کے حوالے سے، تاکہ مشرق وسطیٰ، خصوصاً غزہ اور مغربی کنارے میں امن قائم کیا جا سکے۔
ماہرین کے مطابق بین الاقوامی مالیاتی فنڈ یعنی آئی ایم ایف کے پروگرام کے تحت بیرونی اور مالیاتی توازن میں بہتری سے میکرو اقتصادی استحکام پر اعتماد مضبوط ہوا ہے۔
مزید پڑھیں: پاکستان میں آف شور تیل و گیس کی تلاش، معیشت کے لیے گیم چینجر قرار
واضح رہے کہ گزشتہ روز یعنی جمعرات کو اسٹاک ایکسچینج میں خریداری کا رجحان جاری رہا اور سرکاری اقدامات کے بارے میں مثبت توقعات کے سبب 100 انڈیکس ایک نیا ریکارڈ قائم کرتے ہوئے 159,280.09 پر بند ہوا، جو 1,043.42 پوائنٹس یعنی 0.66 فیصد اضافے کے برابر تھا۔
عالمی منڈیوں میں ایشیا کے حصص جمعہ کو مندی کا شکار ہوئے، خاص طور پر فارماسیوٹیکل کمپنیوں میں کمی دیکھی گئی، جس کی وجہ امریکی صدر ڈونلڈ ٹرمپ کی نئی پابندیوں اور مضبوط امریکی اقتصادی ڈیٹا کے بعد شرح سود میں بڑے کٹوتی کے امکانات کا کم ہونا تھا۔
