وزیراعظم پاکستان محمد شہباز شریف نے اقوام متحدہ جنرل اسمبلی کے 80 ویں اجلاس سے خطاب کرتے ہوئے کہا کہ پاکستان پرامن بقائے باہمی اور تنازعات کے سفارتی حل پر یقین رکھتا ہے، تاہم کسی بھی جارحیت کی صورت میں ملک اپنے دفاع کے لئے فیصلہ کن اقدامات کرنے کی بھرپور صلاحیت رکھتا ہے۔
وزیراعظم نے اپنی تقریر کا آغاز قرآن پاک کی تلاوت سے کیا اور جنرل اسمبلی کی صدر کو اجلاس کی صدارت پر مبارکباد پیش کی۔ انہوں نے سیکریٹری جنرل انتونیو گوتریس کی قیادت کو خراج تحسین پیش کرتے ہوئے کہا کہ مشکل ترین حالات میں ان کی جرات مندانہ رہنمائی قابل ستائش ہے۔
🔴 پاکستانی وزیراعظم شہباز شریف:
ہم مئی میں بھارت کے ساتھ جھڑپوں کے دوران اپنی سفارتی معاونت کے لیے ترکیے، چین، سعودی عرب، آذربائیجان اور دیگر کا شکر گزار ہیں۔
ہم نے جنگ جیت لی، اب امن جیتنے کی کوشش کر رہے ہیں۔
— RTEUrdu (@RTEUrdu) September 26, 2025
شہباز شریف نے کہا کہ آج دنیا پہلے سے کہیں زیادہ پیچیدہ ہو چکی ہے، تنازعات شدت اختیار کر رہے ہیں اور عالمی قوانین کی کھلم کھلا خلاف ورزی جاری ہے۔ انسانی بحران بڑھ رہے ہیں جبکہ دہشت گردی ایک بڑے خطرے کے طور پر ابھر چکی ہے۔ انہوں نے کہا کہ گمراہ کن پروپیگنڈا اور جعلی خبروں نے عالمی سطح پر اعتماد کو متزلزل کر دیا ہے اور ماحولیاتی تبدیلی پوری دنیا کی بقا کے لیے بڑا چیلنج بن چکی ہے۔
مزید پڑھیں: شہباز شریف کی امریکی صدر ٹرمپ سے ملاقات، بھارتی شہری اپنے وزیراعظم مودی پر پھٹ پڑے
وزیراعظم نے کہا کہ پاکستان کی خارجہ پالیسی بابائے قوم کے وژن کی رہنمائی میں تشکیل دی گئی ہے، جو پرامن بقائے باہمی اور مکالمے پر مبنی ہے۔ انہوں نے کہا کہ گزشتہ سال اسی پلیٹ فارم سے دنیا کو خبردار کیا تھا کہ پاکستان کسی بھی جارحیت پر فیصلہ کن اقدام کرے گا، اور مئی میں مشرقی محاذ پر دشمن کی جارحیت کے وقت یہ الفاظ سچ ثابت ہوئے۔
🔴 پاکستان کے وزیراعظم شہباز شریف:
فلسطین اب مزید اسرائیلی زنجیروں تلے نہیں رہ سکتا۔ اسے پوری قوت کے ساتھ آزادی دلوانی چاہیے۔
— RTEUrdu (@RTEUrdu) September 26, 2025
انہوں نے کہا کہ غرور میں مبتلا دشمن کو ذلت کا سامنا کرنا پڑا۔ بھارت نے پہلگام واقعے کی تحقیقات میں تعاون سے انکار کیا اور انسانی المیے کو سیاسی فائدے کے لیے استعمال کرنے کی کوشش کی۔ وزیراعظم نے کہا کہ بھارت نے شہری علاقوں پر حملے کر کے معصوم جانوں کو نشانہ بنایا اور پاکستان کی سرحدی سالمیت کی خلاف ورزی کی۔
مزید پڑھیں: ٹرمپ کے کوٹ پر ’لڑاکا طیارے کی پن‘، کیا اس میں بھارت کے لیے کوئی پیغام ہے؟
شہباز شریف نے کہا کہ پاکستان نے اقوام متحدہ کے چارٹر کے آرٹیکل 51 کے تحت اپنے دفاع کا حق استعمال کیا۔ انہوں نے کہا کہ فیلڈ مارشل سید عاصم منیر کی قیادت میں مسلح افواج نے جرات اور پیشہ ورانہ مہارت کا مظاہرہ کیا جبکہ ایئر چیف مارشل ظہیر احمد بابر کی قیادت میں شاہینوں نے دشمن کے 7 جنگی طیاروں کو تباہ کرکے تاریخ رقم کی۔
اقوام متحدہ کی جنرل اسمبلی میں وزیراعظم شہباز شریف کے خطاب کے دوران پاکستان زندہ باد کے نعرے۔۔۔ pic.twitter.com/PRvosovXlR
— Khawaja Yaseen Usmani (@YaseenUSM_Offl) September 26, 2025
مزید پڑھیں: گردشی قرضے کے خاتمے کی اسکیم کا آغاز، وزیر اعظم شہباز شریف کی نیویارک سے ورچوئل شرکت
وزیراعظم نے کہا کہ پاکستان کے جانبازوں اور شہداء نے بے مثال قربانیاں دیں۔ انہوں نے کہا کہ ہم شہداء کے ورثاء کو سلام پیش کرتے ہیں، ان کے نام عزت و وقار کے ساتھ ہمیشہ زندہ رہیں گے اور شہداء کی ماؤں کے حوصلے ہمارے راستے کو روشن کرتے رہیں گے۔ انہوں نے عزم ظاہر کیا کہ ہمارے شہداء کی قربانیاں کبھی رائیگاں نہیں جائیں گی۔
