پاکستان کرکٹ بورڈ(پی سی بی ) کے چیئرمین نجم سیٹھی نے بھارت کی جانب سے مسلسل ہٹ دھرمی کے مظاہرے پر ون ڈے کرکٹ ورلڈ کپ کے بائیکاٹ کا عندیہ دے دیا ہے۔
غیرملکی میڈیا سے گفتگو کرتے ہوئے نجم سیٹھی کا کہنا تھا کہ اس بات کا ‘بہت قوی امکان’ ہے کہ اگر بھارت ایشیا کپ کے لیے پاکستان نہیں آتا تو ہم بھی بھارت میں ورلڈ کپ نہیں کھیلیں گے۔
چیئرمین پی سی بی کا کہنا تھا کہ ستمبر میں پاکستان میں’ ایشیا کپ‘ ہونے جا رہا ہے جس کے لیے بھارت نے تاحال پاکستان آنے کی حامی نہیں بھری ہے اور اس پر بھارت ہٹ دھرمی کررہا ہے۔
نجم سیھٹی کا کہنا تھا کہ پاکستان سنہ 2008 کے بعد پہلی بار ایشیا کپ کی میزبانی کرنے والا ہے لیکن بھارت بار بار سیکیورٹی خدشات کا حوالہ دیتے ہوئے پاکستان آنے سے انکار کر دیتا ہے۔ پی سی بی بھارت کو’ہائبرڈ’ معاہدے کی بھی پیشکش کر چکا ہے ار معاہدے کے تحت پاکستان متحدہ عرب امارات میں بھی کھیلنے کے لیے تیار ہے۔
انہوں نے کہا کہ بورڈ آف کنٹرول فار کرکٹ ان انڈیا (بی سی سی آئی) نے پاکستان کو اب تک اس پیشکش کا کوئی باضابطہ جواب نہیں دیا ہے اور بھارت چاہتا ہے کہ پورا ٹورنامنٹ پاکستان سے باہر ہو اور وہ تمام میچز غیر جانبدار مقام پر چاہتا ہے۔
نجم سیٹھی نے کہا کہ سنہ 2008 کے بعد سے پاکستان اور بھارت دونوں ممالک میں دہشت گردی کے حوالے سے بہتری آ چکی ہے۔ انہوں نے مزید کہا کہ سنہ 2009 میں سری لنکا پرحملہ ہوا لیکن اس کے بعد پاکستان میں عالمی کرکٹ پوری طرح واپس آ چکا ہے اور یہاں اب سیکیورٹی کا کوئی مسئلہ نہیں۔
انہوں نے واضح کیا کہ اس بات کا قوی امکان ہے کہ اگر بھارت پاکستان میں ایشیا کپ کھیلنے کے لیے آمادہ نہیں ہوتا توپھر پاکستان کو بھی اکتوبر و نومبر میں بھارت میں ہونے والے ون ڈے کرکٹ ورلڈ کپ کا مجبوراً بائیکاٹ کرنا پڑے گا۔
