معروف مزاحیہ فنکار ولی شیخ کی گاڑی ان کے گھر کے باہر سے چوری ہو گئی۔ کامیڈین نے اس واقعے پر افسوس کا اظہار کرتے ہوئے عوام اور حکام سے مدد کی اپیل کی ہے۔
ولی شیخ نے ایک ویڈیو پیغام میں بتایا کہ وہ کراچی کے علاقے ملیر میں رہائش پذیر ہیں اور ان کی سفید رنگ کی ویگن آر گاڑی معین آباد میں ان کے گھر کے سامنے سے صبح 4 سے 5 بجے کے درمیان نامعلوم افراد چوری کرکے لے گئے۔
کامیڈین کے مطابق، گاڑی چوری ہونے کے فوراً بعد انہوں نے پولیس ہیلپ لائن 15 پر رابطہ کیا، تاہم کوئی مؤثر جواب موصول نہیں ہوا۔ بعد ازاں وہ ماڈل کالونی تھانے پہنچے، جہاں پولیس نے ان کی شکایت پر مناسب ردعمل دیا اور مکمل تعاون کی یقین دہانی کرائی۔
یہ بھی پڑھیں: کوئٹہ میں چوری شدہ گاڑیاں اور موٹرسائیکلیں کہاں فروخت ہوتی ہیں؟
ولی شیخ کا کہنا تھا کہ وہ ایک محنت کش فنکار ہیں اور بڑی مشکل سے یہ گاڑی خریدی تھی۔ انہوں نے سندھ حکومت اور متعلقہ اداروں سے اپیل کی ہے کہ چوری شدہ گاڑی کو بازیاب کروا کر انہیں واپس کی جائے اور جرائم میں ملوث عناصر کے خلاف سخت کارروائی کی جائے۔
اپنے مداحوں سے اپیل کرتے ہوئے ولی شیخ نے کہا کہ وہ ان کے ویڈیو پیغام کو زیادہ سے زیادہ شیئر کریں تاکہ ان کی آواز حکام بالا تک پہنچ سکے۔
